बैतडी–करेन्ट लागेर गम्भीर घाइते भएकी दार्चुलाकी कुमारी तितराको मृत्यु भएपछि क्षतिपूर्तीको माग गर्दै स्थानीयहरुले गोकुलेश्वर –गण्न्ना सडक अवरुद्ध गरेका छन् ।
करेन्ट लागेर गम्भीर घाइते भएकी दार्चुलाको शैल्यशिखर १ बारिलकी ५५ बर्षीया कुमारी तितराको उपचारका क्रममा मंगलबार राति मृत्यु भएपछि मृतकका आफन्त र स्थानीय आन्दोलित भएका हुन् ।
गएको चैत ९ गते बाख्रा चराउने क्रममा तितरालाई करेन्ट लागेर गम्भीर घाइते भएकी थिइन् ।उनको काठमाण्डौंस्थित बर्निङ अस्पतालमा उपचार भइरहेको थियो । उपचारकै क्रममा उनको हिजो राति निधन भएको हो ।
विद्युत प्राधिकरणले भुईमा लत्रिएको तारमा छोएर करेन्ट लागेको बताएको छ । तर स्थानीयहरुले भने होचो पोलका कारण छोइएर करेन्ट लागेको बताएका छन् ।
पीडित परिवारलाई क्षतिपूर्ती दिनुपर्ने, विद्युत प्राधिकरणसंग भएको सहमति अनुसार उपचार खर्च दिनुपर्ने लगायतका माग राखेर मृतकका आफन्त र स्थानीयहरुले बुधबार बिहानैदेखि गोकुलेश्वर–गण्ना–लटिनाथ सडक अवरुद्ध गरेका हुन् ।
स्थानीयहरुले सडक अवरुद्ध गरेपछि दार्चुलाको गोकुलेश्वरबाट बैतडीको गण्ना हुँदै दार्चुलाको लटिनाथ सम्म जाने र आउने सवारी साधन बीचबाटोमै रोकिएका छन् ।
विद्युत प्राधिकरणको लापरवाहीका कारण दुर्घटना भएकाले आफूहरुका माग पूरा नहुँदा सम्म आन्दोलनका कार्यक्रम यथावत रहने शैल्यशिखर नगरपालिका १ बारिलका अक्षय तितराले बताए ।
