दार्चुला –दार्चुलास्थित शैल्यशिखर मालिकार्जुन धाममा आज पूजन जात्रा लाग्ने भएको छ । हरेक बर्ष असार शुक्ल चतुर्दशीका दिन मालिकार्जुन धाममा पूजन जात्रा लाग्ने गरेको स्थानीय शिक्षक समेत रहेका गंगासागर जोशीले बताए ।
भगवान शिवको साक्षात स्वरुपको रुपमा मालिकार्जुन धाममा पूजाअर्चना गर्ने गरिन्छ । मालिकार्जुन धाममा लाग्ने पूजन जात्राको अवसरमा आज दार्चुलाका दुईओटा स्थानीय तहले सार्वजनिक बिदा दिएका छन् ।
जिल्लाको शैल्यशिखर नगरपालिका र मालिकार्जुन गाउँपालिकाले शैल्यशिखर मालिकार्जुन धाममा पूजन जात्राको अवसरमा सार्वजनिक बिदा दिएका छन् । दुवै पालिकामा रहेका विद्यालय तथा सरकारी कार्यालयहरु आज बन्द रहनेछन् ।
मालिकार्जुन धाममा लाग्ने पूजन जात्रामा दार्चुलाका मात्रै नभएर सुदूरपश्चिमका विभिन्न जिल्लाका दर्शनार्थीका साथै सीमावर्ती भारतीय दर्शनार्थी समेत आउने गरेका स्थानीयहरुले बताएका छन् ।
