बैतडी- दार्चुलाको दोस्रो ठुलो बजार गोकुलेश्वरको  फोहोर  लामो समय सम्म पनि नउठेपछि स्थानीयहरुले  नगरपालिकामा लगेर  फालेका छन् । पटकपटक आग्रह गर्दा पनि  बजारको  फोहोर व्यवस्थापन नभएपछि आक्रोशित  स्थानीय  व्यापारीहरुले  शैल्यशिखर नगरपालिकाको परिसरमा फालेका हुन् ।  

 गोकुलेश्वर बजार क्षेत्रमा थुप्रिएको फोहोर आफैले सङ्कलन गरी नगरपालिकाका परिसरमा फालेको स्थानीयले जानकारी दिए ।स्थानीय तथा व्यापारीहरुले नगरप्रमुखको कार्यालय छेउमा नै लगेर फोहोर फालेका हुन्  ।  शैल्यशिखर नगरपालिका—९ गोकुलेश्वर बजारबाट निस्किने फोहोर  विगत लामो समयदेखि उठेको  छैन् । फोहोरको उचित व्यवस्थापन नगरिदा  बजार क्षेत्र दुर्गन्धित बनेको  छ ।  

बजारमा फोहोरको चाङ लाग्दा समेत नगरपालिकाले चाँसो नदेखाएको,अव्यवस्थित फोहोरले बजारको स्वरूप नै कुरूप भएपछि बाध्यभएर  नगर परिसरभित्र फालेका स्थानीयको भनाई  छ ।   फोहोर   व्यवस्थापनको लागि डम्पिङ साइडको अभाव भए पनि नगरपालिका   मौन बसेको स्थानीयहरुको  आरोप छ ।