बैतडी– जिल्ला ट्राफिक प्रहरी कार्यालय बैतडीले जिल्लामा सञ्चालित छोटो दुरीका सवारी साधनमा भाडादरको सूची टाँसे नटाँसेको अनुगमन गर्न सुरू गरेको छ । यस अघि नै भाँडादर टाँस गर्न जानकारी गराइसकेको भए पनि अटेर गरेको पाइएकोले अनुगमन गरेर कार्वाहीको दायरामा ल्याउने हेतुले प्रहरीले यो अभियान चलाएको हो ।
जिल्लामा भाडादर टाँस्न पटक पटक आग्रह गरेको र अबका दिनमा भाडादर नटाँसि सवारी गुडाउने चालकहरूलाई कार्वाहीको दायरामा ल्याउने गरि अनुगमन गरिरहेको ट्राफिक प्रहरी कार्यालय बैतडीका प्रमुख सहायक निरिक्षक आकाश रावलले बताए ।
भाडादरको सूची नहुँदा यात्रु ठगिने सम्भावना बढेकाले यो अभियान सञ्चालनमा ल्याएको सहायक निरिक्षक रावलले बताए । भाडादर भन्दा बढी भाडा नतिर्न र बढी भाडा लिएमा ट्राफिक प्रहरीलाई जानकारी दिन समेत आग्रह गरिएको छ । भाडादरको सुचि टाँस्न अनिवार्य गरिएपनि यातायात व्यवसायीले कच्ची सडकमा भने मनोमानी भाडा लिने गरेको गुनासो आइरहेको छ ।
बैतडीमा एकदर्जन बढी कच्ची सडकमा जिपहरु सञ्चालन हुने गरेका छन् । कच्ची सडकमा जिप व्यवसायीले मनोमानी भाडा लिँदा यात्रुहरु मारमा पर्ने गरेका छन् ।
पछिल्लो समय पेट्रोलियम पदार्थको मूल्य बढे सगै थोरै भाडा दर बढेको भएपनि चर्को दरमा भाडा लिने गरेको पाइएकोले गैरकानुनी कार्य नगर्न सचेत गराइएको छ ।
