बैतडी –बैतडीका विभिन्न समस्याका बारेमा प्रधानमन्त्री शेरबहादुर देउवाको ध्यानाकर्षण गराइएको छ । कांग्रेस बैतडीका सभापति चतुरबहादुर चन्दको नेतृत्वमा गएको टोलीले आज प्रधानमन्त्रीसंग भेटघाट गरेर विभिन्न समस्याका बारेमा अवगत गराएको नेपाली कांग्रेस डिलाशैनी गाउँ कार्यसमितिका सभापति जयानन्द जोशीले जानकारी दिए ।
नेताहरुले बैतडीमा लेन्थवर्करको समस्या, बाढी पहिरो पीडितको समस्या, पश्चिम सेती परियोजनाका कार्यान्वयनका बिषयमा प्रधानमन्त्रीको ध्यानाकर्षण गराएको नेपाली कांग्रेस बैतडीका सभापति चतुरबहादुर चन्दले बताए ।
प्रधानमन्त्रीले लेन्थवर्करका समस्या समाधानका लागि पहल गर्ने प्रतिबद्धता जनाएका छन् भने बाढी पहिरोका कारण भएको समस्या समाधानका लागि पनि सरकारले पहल गर्ने प्रतिबद्धता समेत जनाएका छन् ।
यस्तै कांग्रेस बैतडीका सभापति चन्दले बैतडीमा नेपाली कांग्रेस पार्टीको भवन निर्माणका लागि समेत पार्टी सभापति शेरबहादुर देउवाको ध्यानाकर्षण गराएका छन् । पार्टीका नवनिर्वाचित सभापति देउवालाई बैतडी कांग्रेसको भवन निर्माणका लागि कांग्रेसको केन्द्रिय कार्यसमितिले पहल गरिदिन आग्रह गरिएको सभापति चन्दले बताए ।
टोलीमा नेपाली कांग्रेसका नेता रमेश लेखकको समेत सहभागिता रहेको थियो । प्रधानमन्त्रीसंग भेटघाटको व्यवस्थापन मिलाएकोमा कांग्रेस बैतडीले नेता लेखकलाई धन्यवाद समेत ज्ञापन गरेको छ ।
