बैतडी –कार्तिक पहिलो साता परेको बेमौसमी बर्षाका कारण सेती नदीमा आएको बाढीले सिगासको ढुंगाड क्षेत्रमा बगाएको बाटो पुनर्निर्माण कार्य शुरु भएको छ । ढुंगाडदेखि बझाङको देउरा जोड्ने बाटो हिड्नै नमिल्ने गरी बगाएपछि बाटो निर्माण कार्य शुरु भएको हो ।
सिगास गाउँपालिका वडा नं ५,६ र ७ का स्थानीयको मुख्य बजार बझाङको देउरा भएकाले सो क्षेत्रमा जाने बाटो पुनर्निर्माणको काम शुरु गरिएको सिगास गाउँपालिकाका अध्यक्ष हरिसिंह धामीले बताए । उनले भने ‘कुनै कुनै ठाउँमा हिड्नै नमिल्ने गरी बाटो बगाएको छ । त्यसैले समस्या भएका ठाउँमा बाटो निर्माण कार्य अघि बढाएका छौं ।’
सेती नदीले बाटो बगाउँदा करीब दुई सय मिटरमा भने हिड्नै नमिल्ने गरी बाटो सेती नदीमा मिसिएको अध्यक्ष धामीले बताए । माथि ठूलो भीर तल सेती नदी भएको ठाउँमा पर्खाल लगाएर बाटो निर्माणको काम शुरु गरिएको उनले बताए ।
ढुंगाडदेखि देउरा जाने बाटो ठाउँठाउँमा अवरुद्ध हुँदा स्थानीयहरुलाई दैनिक उपभोग्य सामग्रीको समेत अभाव भएको छ । अहिले ढुंगाडबासीहरुले डडेल्धुराबाट खच्चरमा सामान मगाएर जोहो गरिरहेका छन् ।
सिगासको वडा नं ६ र ७ का स्थानीयहरुलाई बाटो समस्या हुँदा दैनिक उपभोग्य सामग्रीको जोहो गर्न निकै मुस्किल भएको स्थानीय समेत रहेका शिक्षक पदम साउँदले बताए ।
कार्तिक पहिलो साता परेको बेमौसमी बर्षाले सिगासका विभिन्न स्थानमा क्षति पुर्याएको छ भने स्थानीयहरुका खेत बगरमा परिणत भएका छन् ।
