बैतडी– गत साता सेती नदीमा आएको बाढीले सबैभन्दा बढी बैतडीको सिगास गाउँपालिका ५ ढुंगाडमा क्षति पुर्याएको छ । नदीले स्थानीयको सबै जमीन बगाएर बगरमा परिणत गरिदिएको छ । धान रोपेको खेत सबै बगरमा परिणत भएपछि अहिले त्यहाँका १५० परिवारको बिचल्ली भएको छ ।
सेती नदीले घर मात्रै बाँकी राखेको र जमीनजति बगाईसकेको स्थानीय राजेन्द्र चन्दले बताए । उनले भने ‘सेती नदीले जमीन जति सबै बगाईसकेको छ । घरहरु मात्रै बाँकी रहेका छन् । त्यसैले हामीलाई सुरक्षित बास स्थान चाहिएको छ ।’
अब बर्षा भएमा सेती नदी जुनसुकै बेला पनि बस्तीमा पस्ने डर रहेको स्थानीय मंगलबहादुर चन्दले बताए । उनले भने ‘अब हामीलाई सुरक्षित स्थानमा बस्ती स्थानान्तरण गरिदिनु पर्दछ । नत्र सेती नदीले जुनसुकै बेला पनि हामीलाई दुःख दिन सक्छ ।’
सेतीको बाढीले खेत सबै बगाएर तहसनहस गरेपछि अहिले ढुंगाडबासीले सुरक्षित बासस्थानको माग गरिरहेका वडा अध्यक्ष रामबहादुर धामीले बताए । उनले भने ‘स्थानीयहरुले राहत होइन् सुरक्षित बसोबासको माग गरिरहेका छन् । उनीहरुका आवाजलाई हामीले पनि सबै तहका सरकारसंग पुर्याईरहेका छौं ।’
ढुंगाडबासीका समस्या बुझ्न प्रधानमन्त्री शेरबहादुर देउवा ढुंगाड पुगेको बेला पनि आफूहरुले सुरक्षित बासस्थानको माग गरेको स्थानीय विष्णु चन्दले बताए । उनले भने ‘हामीले के सेती नदीमा पक्की तटबन्ध हुनुपर्ने भनेका छौं । नत्र हामीलाई सुरक्षित स्थानमा स्थानान्तरण गरियोस भनेका छौं ।’
यस्तै प्रदेश सरकारको टोलीसंग पनि ढुंगाडबासीले सुरक्षित बासस्थानको माग गरेका छन् । समान्य राहतले केही नहुने भएकाले आफूहरुले सुरक्षित बासस्थानको माग गरेको स्थानीय प्रेम चन्दले बताए ।
बेमौसमी बर्षाले सेती नदीमा आएको बाढीले ढुंगाडमा सबैभन्दा बढी क्षति पुर्याएकाले ढुंगाडबासीका मागलाई आफूले प्रधानमन्त्री समक्ष राखेको सिगास गाउँपालिकाका अध्यक्ष हरिसिंह धामीले बताए । उनले भने ‘सेती नदीमा पक्की तटबन्ध गरेर हुन्छ कि उनीहरुलाई अन्यत्र सारेर हुन्छ, ढुंगाडबासीको समस्या समाधान गरिदिन आग्रह गरेको छु । प्रधानमन्त्रीबाट सकारात्मक जवाफ पाएको छु ।’
ढुंगाडमा अहिले बाढी पहिरो खानेपानी, बाटोघाटो सबै नष्ट गरेको छ भने स्थानीयहरुलाई खानेपानीको समेत समस्या भएको छ ।
