बैतडी –बैतडीमा आजदेखि कोरोना विरुद्धको भेरोसेल खोपको दोश्रो मात्रा लगाइने भएको छ । गत असोज ९ गतेदेखि पहिलो मात्रा लगाएका नागरिकलाई आजदेखि भेरोसेल खोपको दोश्रो मात्रा दिइने स्वास्थ्य कार्यालयका सूचना अधिकारी हरिश भट्टले जानकारी दिए ।
खोप अभियान अन्तर्गत आज र भोली पुर्चौंडी नगरपालिका र मेलौली नगरपालिकामा खोप लगाइनेछ । यस्तै कार्तिक १० र ११ गते शिवनाथ गाउँपालिका, पञ्चेश्वर गाउँपालिका र दोगडाकेदार गाउँपालिकामा खोप लगाइनेछ ।
यस्तै कार्तिक ११ र १२ गते पाटन नगरपालिका, दशरथचन्द नगरपालिका र सुर्नया गाउँपालिकामा खोप अभियान सञ्चालन हुनेछ । कार्तिक १४ र १५ गते सिगास गाउँपालिका र डिलाशैनी गाउँपालिकामा खोप अभियान सञ्चालन हुने स्वास्थ्य कार्यालयले जनाएको छ ।
प्रत्येक वडाका खोपकेन्द्र मार्फत खोप लगाइने स्वास्थ्य कार्यालयका प्रमुख योगेशप्रसाद भट्टले जानकारी दिए । खोप लगाउन जाँदा भेरोसेल खोपको पहिलो मात्रा लगाएको कार्ड अनिवार्य रुपमा खोपकेन्द्र लगेर जान आग्रह गरिएको छ ।
यस्तै स्वास्थ्यका मापदण्ड अपनाउन पनि आग्रह गरिएको छ । बैतडीमा अहिले सम्म ५७ हजार नागरिकलाई कोरोना विरुद्धको खोप दिइएको छ ।
