बैतडी –बैतडीको सतबाँझस्थित नेरुडे मिर्मिरे लघुबित्त बित्तीय संस्थाले एक सदस्यका परिवारलाई किरिया खर्च बाफतको रकम हस्तान्तरण गरेको छ ।
लघुबित्तले सुर्नया गाउँपालिका –४ की झरना महरालाई किरिया खर्च बापतको २५ हजार रुपैयाँ आज उनकै घरमा पुगेर हस्तान्तरण गरेको लघुबित्तका प्रमुख कमल जोशीले बताए । झरनाका श्रीमान हरिशसिंह भाटको गत जेठ ७ गते निधन भएको थियो ।
संस्थाकी सदस्य झरनाले लघुबित्त बित्तीय संस्थाबाट कृषि तथा पशुपालन व्यवसायका लागि ३ लाख ऋण निकालेकी थिइन् । ऋण लिएको एक महिनामै उनका श्रीमानको निधन भएपछि उक्त ऋण मिनाहा भएको नेरुडे मिर्मिरे लघुबित्त बित्तीय संस्थाका कनिष्ठ सहायक विनोदप्रसाद अवस्थीले बताए ।
ऋण लिने बेला नै समूहकी सदस्य झरना र उनका श्रीमानको बीमा गरेकाले ऋण मिनाहा भएको अवस्थीले बताए । उक्त ऋण बीमाबाट चुक्ता गरिने बताइएको छ ।
नेरुडे मिर्मिरे लघुबित्त बित्तीय संस्थाले समस्यामा परेका सदस्यहरुलाई सहयोग गर्दै आएको संस्थाका प्रमुख जोशीले बताए । यसअघि पनि समस्यामा परेका सदस्यहरुलाई सहयोग गरिएको उनले बताए ।
