बैतडी –बैतडीमा ४५ बर्ष माथिका सबै नागरिकलाई कोरोना विरुद्धको खोप दिने कार्य शुरु गरिएको छ । जिल्लाभरी ४५ बर्ष माथिका नागरिकलाई कोरोना विरुद्धको भेरोसेल खोपको पहिलो मात्रा दिने कार्य शुरु गरिएको स्वास्थ्य कार्यालयका खोप सुपरभाइजर निरीक्षक हरिश भट्टले जानकारी दिए ।
पुर्चौंडी नगरपालिका र शिवनाथ गाउँपालिकामा खोप दिने कार्य सम्पन्न भएको छ भने मेलौली नगरपालिकामा आजदेखि खोप अभियान शुरु भएको छ ।
यस्तै दशरथचन्द नगरपालिका, सुर्नया गाउँपालिका र दोगडाकेदार गाउँपालिकामा भोली र पर्सी खोप अभियान सञ्चालन हुने खोप सुपरभाइजर निरीक्षक भट्टले जानकारी दिए ।
यसैगरी पञ्चेश्वर गाउँपालिका र सिगास गाउँपालिकामा असोज १२ र १३ गते खोप अभियान सञ्चालन हुनेछ भने डिलाशैनी गाउँपालिकामा असोज १४ र १५ गते खोप अभियान सञ्चालन हुने बताइएको छ । भेरोसेल खोपको दोश्रो मात्रा २८ दिनभित्र लगाईसक्नुपर्ने हुन्छ ।
जिल्लाका प्रत्येक वडाका खोप केन्द्रहरुबाट खोप दिने कार्य भईरहेको बताइएको छ । खोप केन्द्रमा जाँदा स्वास्थ्यका मापदण्ड परिपालना गर्न स्वास्थ्यकर्मीहरुले सुझाव दिएका छन् ।
