बैतडी–बैतडीको शिवनाथ गाउँपालिका–४ लोजनीस्थित पिपलकोट माविका प्रधानाध्यापक दामोदर ओझामाथि कालोमोसो दलेर जुत्ताको माला लगाएको आरोपमा पक्राउ परेकाहरुमाथि प्रहरीले अनुसन्धान अघि बढाएको छ ।
बिहीबार दिउँसो प्रधानाध्यापक ओझामाथि अभद्र व्यवहार गरेका शिवनाथ गाउँपालिका–४ का ४२ बर्षीय प्रेमसिंह महता, उनकी श्रीमती ३७ बर्षीया तारा महता, प्रेमसिंहका भाइ ३८ बर्षीय मोहनसिंह महता र उनकी श्रीमती ३४ बर्षीया शकुन्तला महतालाई प्रहरी शुक्रबार दिउँसो पक्राउ गरेको थियो ।
पक्राउ परेका चारैजनामाथि जिल्ला अदालतबाट पाँच दिनको म्याद थपेर अभद्र व्यवहार गर्न नहुने कसुर मुद्दामा अनुसन्धान भइरहेको जिल्ला प्रहरी कार्यालय बैतडीका प्रवक्ता, प्रहरी निरीक्षक बल्देव बडूले बताए ।
यो घटनाका बिषयमा सुक्ष्म रुपले अनुसन्धान भइरहेको र अनुसन्धानपछि फाइल जिल्ला प्रशासन कार्यालयमा पेश गरिने प्रहरी निरीक्षक बडूले बताए ।
महता परिवारका सदस्यहरुले बिहीबार दिउँसो विद्यालयमै पुगेर प्रधानाध्यापक ओझामाथि कालोमोसो दलेर जुत्ताको माला लगाएका थिए । उनीहरुले ओझाको घाँटीमा ‘म अपराधी हुँ’ लेखिएको पम्प्लेट समेत हालेका थिए ।
पिपलकोट माविमा प्राथमिक तहको शिक्षक भर्नाको बिषय यो घटनासँग जोडिएको देखिएको छ । गएको वैशाख १२ गते प्रअ ओझाले महिलामाथि दुर्व्यवहार गरेको आरोप लगाएको छ । आफूमाथि प्रअले दुर्व्यवहार गरेको आरोप लगाएकी महिला शिक्षकको परीक्षामा अनुत्तीर्ण भएपछि उक्त घटना भएको दाबी गरिएको छ ।
पिपलकोट माविमा एक जना प्राथमिक तहको शिक्षक भर्नाका लागि आवदेन आह्वान गरेकोमा १७ जनाले आवेदन दिएको र १४ जना परीक्षामा सहभागी भएका थिए । सहभागी मध्ये ती महिला पनि परीक्षामा सहभागी भएकी र अनुत्तीर्ण भएकी विद्यालय व्यवस्थापन समितिका अध्यक्ष भरत साउँदले बताए ।
परीक्षा हुनु अघि ती महिलाले प्रअ ओझासँग आर्थिक लेनदेनको बिषय समेत राखेको तर आफूले परीक्षा निष्पक्ष हुनुपर्छ भनेको अध्यक्ष साउँदले बताए ।
शिक्षक भर्नाकै बिषयसँग जोडिएर प्रअमाथि कालोमोसो दल्ने र जुत्ताको माला लगाउने काम भएको अध्यक्ष साउँदको भनाइ छ ।
