बैतडी –बैतडीको डिलाशैनी गाउँपालिका–५ घर भइ सेटीगाउँ मावि ककरपाखामा कार्यरत शिक्षक मानसिंह बोहरामाथि कुटपिट गरेको आरोपमा दुई जना पक्राउ परेका छन् ।
दार्चुलाको शैल्यशिखर नगरपालिका–९ गोकुलेश्वरमा सञ्चालित रामलिला हेर्न गएका शिक्षक बोहरामाथि शुक्रबार राति कुटपिट भएको थियो । बोहरालाई कुटपिट गरेको आरोपमा शैल्यशिखर नगरपालिका–९ का २९ बर्षीय भूपेन्द्र धामी र शैल्यशिखर–५ का २५ बर्षीय राजेन्द्र रावललाई पक्राउ गरिएको जिल्ला प्रहरी कार्यालय दार्चुलाका प्रवक्ता, प्रहरी निरीक्षक विक्रमबहादुर शाहीले बताए ।
शुक्रबार राति करिब ११ बजे भएको कुटपिटमा घाइते भएका बोहरालाई उनीहरुले एयरपोर्ट नजिकै छोडेर फरार भएको पारिवारिक स्रोतले जनाएको छ । घाइते बोहरा शनिबार बिहान आँफै गोकुलेश्वर अस्पताल पुगेका थिए ।
उनको गोकुलेश्वरमा उपचार सम्भव नभएपछि धनगढी रेफर गरिएको र धनगढीमा उपचार भइरहेको जनाइएको छ । बोहराको अनुहारमा चोट लागेको छ भने हाल स्वास्थ्य अवस्था सुधारोन्मुख रहेको प्रहरी निरीक्षक शाहीले बताए ।
पक्राउ परेका दुवैजनाविरुद्ध ज्यान मार्ने उद्योगमा मुद्दा दर्ता गरेर अनुसन्धान भइरहेको जिल्ला प्रहरी कार्यालय दार्चुलाले जनाएको छ । घटनाका बिषयमा थप अनुसन्धान भइरहेको बताइएको छ ।
शिक्षक बोहरामाथि भएको कुटपिटको घटनाको चौतर्फी आलोचना समेत भइरहेको छ । रामलीला जस्तो धार्मिक अनुष्ठानमा सहभागी भएका बोहरामाथि कुटपिट हुनु निकै निन्दनीय घटना भएको स्थानीयहरुले बताएका छन् ।
