अछाम – सुदूरपश्चिममा महिनावारीका बेला छाउगोठमा बस्ने चलन अहिले पनि कायमै छ । अछामको पञ्चदेवल बिनायक नगरपालिका–५ लयाटीको आलीटोलमा महिला तथा किशोरी महिनावारी (छाउपडी) भएको बेला गोठमा बस्ने चलन कायमै रहेको छ ।
जिल्लामा अभियान सञ्चालन गरेर ढुङ्गा माटोले बनाइएका छाउगोठ भत्काइए पनि घरबाट केहीपर जस्तापाताका गोठ बनेका छन् । पछिल्लो अनुगमनकाक्रममा आलीटोलका हरेकजसो घरमा जस्तापाताले बनाइएको छाउगोठ निर्माण भएका भेटिएको हो । महिनावारी हुँदा घरमा बसे देवीदेउता रिसाउँछन् भन्ने अन्धविश्वास अझै कायम रहेको छ ।
पञ्चदेवल विनायक नगरपालिकाका मेयर अम्बिका चलाउनेले आलीटोलका बासिन्दालाई भेला गराएर तत्काल छाउगोठ भत्काउन अनुरोध गरेकी छन् । छाउगोठ नभत्काए पालिकाबाट पाउने सेवासुविधामा रोक लगाउने समेत उनले बताइन् ।
हिजो बिहान पञ्चदेवल विनायक–८ चुरखोली टोलमा ३५ बर्षीया निम खनाल र मङ्गलसेन नगरपालिका–६ की ३६ बर्षीया रत्ना भण्डारीकी सात वर्षीया छोरी कविता भण्डारीको घर नजिकै त्रिपाल टाँगी बनाइएको छाउगोठमा सुतिरहेको अवस्थामा भिरबाट खसेको ढुङ्गा लागेर ज्यान गएको थियो ।
महिनावारी भएर सुतिरहेकी रत्ना घाइते भएकी छन् । उनी आफ्नो माइती घर बारला गएकी थिइन् ।
अछामका प्रमुख जिल्ला अधिकारी आनन्द सारुले तत्काल जनप्रतिनिधिको समन्वय र प्रहरीको सहयोगमा छाउगोठ भत्काइने बताएका छन् ।
