बैतडी– बैतडीको दशरथचन्द नगरपालिका वडा नं १ मुस्याचौर , गुरूखोलामा लिफ्टिङ्ग सिस्टम द्वारा खानेपानीको व्यवस्था भएपछि स्थानीयहरूलाइ सजिलो भएको छ । पडेलीगाउँ–मुस्चौर–गुरुखोला लिफ्टिङ खानेपानी योजना अन्तर्गत निर्माण गरिएको ट्याङ्कीबाट दैनिक करिब १ सय घर परिवार लाभान्वित भएका छन ।
सतबाँझ खोलाबाट लिफ्टिङ प्रणालीमार्फत पानी तानेर मुस्याचौर,गुरूखोलामा वितरण गरिएको छ । सतबाँझ खोलामा ६३ हजार क्षमताको ट्याङ्की निर्माण गरेर करिब ८ सय मिटरमाथि डाँडामा बनेको ८५ हजार लिटर क्षमताको ट्याङ्कीबाट खानेपानी वितरण भईरहेको हो।
खानेपानीको अभावमा गुज्रिरहेका स्थानीयहरूलाइ पानीको उपलब्धता भएपछि टाढा टाढाबाट पिठ्युँमा पानी बोकेर ल्याउनुपर्ने समस्याबाट मुक्त भएका छन । बेला बेला प्रबिधिक समस्या आउने गरेपनि मर्मत गरेर सेवाग्राहीहरूलाई पानी उपलब्ध गराइरहेको निर्माण उपभोक्ता समितिका अध्यक्ष नर बहादुर टेरले बताए ।
