बैतडी –बैतडीमा पछिल्लो पटक सञ्चालन भएको कोरोना विरुद्धको खोप अभियानमा १७ हजार बढी नागरिकले कोरोना विरुद्धको भेरोसेल खोपको पहिलो मात्रा लगाएका छन् । यही साउन १७ गतेदेखि २१ गते सम्म सञ्चालन भएको खोप अभियान अन्तर्गत १७ हजार २९९ जनाले खोप लगाएका स्वास्थ्य कार्यालयका प्रमुख योगेशप्रसाद भट्टले जानकारी दिए ।
५५ बर्षदेखि ६० बर्ष उमेर समूहका नागरिक, विद्यालयका शिक्षक र कर्मचारी, कलेजका प्राध्यापक र कर्मचारी, सवारी साधनका चालक र सहचालक र यो भन्दा पहिलाको खोप अभियानमा छुटेका लक्षित समूहका व्यक्तिहरुलाई खोप लगाइएको स्वास्थ्य प्रमुख भट्टले जानकारी दिए ।
जिल्लामा १८ हजार डोज भेरोसेल खोप प्राप्त भएकोमा १७ हजार २९९ जनाले खोप लगाएका उनले बताए । सबैभन्दा बढी पुर्चौडी नगरपालिकामा ३ हजार १५० जनाले खोप लगाएका छन् । यस्तै दशरथचन्द नगरपालिकामा २ हजार ३९४ जना, पाटन नगरपालिकामा २ हजार ३१८ जना, दोगडाकेदार गाउँपालिकामा १ हजार ७८६ जना र डिलाशैनी गाउँपालिकामा १ हजार ६६४ जनाले खोप लगाएका छन् ।
यस्तै सिगास गाउँपालिकामा १ हजार ५३४ जना, मेलौली नगरपालिकामा १ हजार ३६४ जना र सुर्नया गाउँपालिकामा १ हजार २६१ जनाले खोप लगाएका स्वास्थ्य कार्यालयका श्रोत व्यक्ति चन्दन सुवेदीले जानकारी दिए ।
बैतडीमा ९६ खोप केन्द्र मार्फत खोप अभियान सञ्चालन भएको बताइएको छ । भेरोसेल खोपको पहिलो मात्रा लगाएका नागरिकलाई २८ दिनभित्र दोश्रो मात्रा दिइने स्वास्थ्य कार्यालयले जनाएको छ ।
