बैतडी –नेपाली कांग्रेस बैतडीले ‘पञ्चेश्वर–पुर्चौंडी दैलो अभियान’ शुरु गरेको छ । पञ्चेश्वरको सैलोडामा आइतबार एक कार्यक्रमको आयोजना गरेर दैलो अभियानको शुरुवात गरिएको नेपाली कांग्रेस बैतडीका सचिव देवराज जोशीले जानकारी दिए ।
‘पञ्चेश्वर–पुर्चौंडी दैलो अभियान’को शुरुवात गर्दै नेपाली कांग्रेस बैतडीका सभापति चतुरबहादुर चन्दले नेपाली कांग्रेसको संगठनलाई विस्तार गर्न र मजबुत बनाउन अभियान सञ्चालन गरिएको बताए ।
नेपाली कांग्रेस पञ्चेश्वर गाउँकार्यसमितिका सभापति रामबहादुर चन्दको अध्यक्षतामा भएको कार्यक्रममा जिल्ला सभापति चन्द प्रमुख अतिथी रहेका थिए । दैलो अभियानको शुभारम्भ कार्यक्रममा जिल्ला सचिवद्वय प्रेमबहादुर चन्द र देवराज जोशी लगायतका नेता कार्यकर्ताहरुको सहभागिता रहेको थियो ।
१२० दिने ‘पञ्चेश्वर–पुर्चौंडी दैलो अभियान’को शुरुवात भएको र पुर्चौंडीको हाटमा कार्यक्रम समापन गरिने नेपाली कांग्रेस बैतडीका सचिव प्रेमबहादुर चन्दले जानकारी दिए ।
प्रत्येक वडामा कम्तीमा दुई अभियान अन्तर्गत अन्तरक्रिया, छलफल, भेटघाट लगायतका कार्यक्रम सञ्चालन हुने सचिव चन्दले बताए ।
१० ओटै पालिकामा अभियानका लागि संयोजक र उपसंयोजक तोकेर अभियानलाई अगाडि बढाइएको छ । अभियानले नेपाली कांग्रेसलाई बलियो बनाउन भूमिका खेल्ने सचिव चन्दले बताए ।
अभियानका बेला नेपाली कांग्रेसका नेता, कार्यकर्ता र शुभेच्छुकहरुसंग अन्तरक्रिया, भलाकुसारीका साथै आगामी दिनमा कांग्रेसलाई कसरी अगाडि बढाउने भन्ने बिषयमा छलफल हुने सचिव चन्दले जानकारी दिए ।
अभियान अन्तर्गत प्रत्येक वडामा अन्तरक्रिया र छलफल गर्ने, घरदैलोमा जाने, स्थानीय नागरिकका समस्या बुझ्ने र समस्या समाधानका लागि आवश्यक पहल गरिने सचिव चन्दले बताए ।
यसअघि शनिबार बसेको नेपाली कांग्रेस जिल्ला कार्यसमितिको बैठकले दैलो अभियान सञ्चालन गर्ने निर्णय गरेको थियो ।
