बैतडी–बैतडीको पञ्चेश्वर गाउँपालिका –४ स्थित कैलपाल मन्दिरमा लाग्ने धुरा जातको अवसरमा देउडा प्रतियोगिता हुने भएको छ । पञ्चेश्वर गाउँपालिका वडा नं ४ को कार्यालयले एक सूचना जारी गर्दै जात्राको अवसरमा मंसिर १८ गते देउडा प्रतियोगिता हुने जनाएको हो ।
स्थानीय कला र संस्कृतिको संरक्षणका लागि देउडा प्रतियोगिताको आयोजना गर्न लागिएको वडा कार्यालयले जनाएको छ । प्रतियोगितामा प्रथम हुनेलाई २१ हजार, दोश्रो हुनेलाई १५ हजार, तेश्रो हुनेलाई १० हजार र चौथो हुनेलाई ५ हजार पुरस्कार प्रदान गरिने आयोजकले जनाएको छ ।
देउडा प्रतियोगितामा सहभागी हुन चाहनेहरुले मंसिर १७ गते साँझ ५ बजेसम्म नामदर्ता गराइसक्नुपर्ने उल्लेख गरिएको छ ।
यस्तै जात्रालाई व्यवस्थित गर्नका लागि स्थानीय प्रकाश चन्दको अध्यक्षतामा मेला व्यवस्थापन समिति गठन गरिएको छ । मेला अवधिभर मेला आसपासका क्षेत्रलाई मदिरा तथा जुवातास निषेधित क्षेत्र घोषणा गरिएको वडा अध्यक्ष जनकबहादुर चन्दले जानकारी दिए ।
मेलामा कसैले मदिरा सेवन गरी होहल्ला गरेमा २ हजार ५ सय र कसैले मदिराको कारोबार गरेमा ५ हजार जरीवाना गर्ने निर्णय समेत भएको छ ।
