बैतडी –बैतडीका स्थानीय तहहरुले आगामी आर्थिक बर्षमा हजार दिने आमालाई प्राथमिकतामा राखेका छन् । हजार दिने आमा र बच्चाको स्वास्थ्य र पोषणका लागि स्थानीय तहहरुले उपमेयर तथा उपाध्यक्षको कोसेली कार्यक्रमलाई निरन्तरता दिएका छन् । हजार दिने आमाको स्वास्थ्यका बारेमा परिवारलाई सचेत बनाउन यो कार्यक्रम प्रभावकारी भएको स्थानीय तहहरुको ठहर रहेको छ ।
कोसेली मार्फत गर्भवती तथा सुत्केरी महिलाहरुको स्वास्थ्य र पोषणका बिषयमा परिवारका सदस्यहरुले ख्याल राख्नुपर्छ भन्ने कुरामा स्थानीयहरु जानकार भएका मेलौली नगरपालिकाका उपप्रमुख राधा ओझाले बताइन् । उपमेयरको कोसेली कार्यक्रमले संस्थागत सुत्केरी हुनेको संख्या बढाएकाले पनि यो कार्यक्रमलाई निरन्तरता दिएको उनले बताइन् । उनले भनिन् ‘यो कार्यक्रमले गर्भवती तथा सुत्केरी महिलाहरुको स्वास्थ्यको बारेमा परिवारका सदस्यहरु जानकार भएका छन् ।’
जिल्लाको सुर्नया गाउँपालिकाले आगामी आर्थिक बर्षको नीति तथा कार्यक्रममा उपाध्यक्षको कोसेली कार्यक्रमलाई निरन्तरता दिएको छ । मातृ तथा शिशुमृत्युदरमा कमी ल्याउन कार्यक्रम प्रभावकारी रहेको पालिकाको ठहर छ ।
यस्तै पुर्चौंडी नगरपालिकाले शुरु बर्षदेखि नै सञ्चालनमा ल्याएको उपमेयरको कोसेली कार्यक्रमलाई निरन्तरता दिएको उपप्रमुख जानकी ऐर बमले जानकारी दिइन् । जिल्लाको दोगडाकेदार गाउँपालिकाले पनि उपाध्यक्षको कोसेली कार्यक्रमलाई निरन्तरता दिनुका साथै छोरी जन्माउने आमालाई प्रोत्साहन भत्तामा थप गरेको उपाध्यक्ष पार्वती कार्कीले बताइन् । उनले भनिन् ‘हजार दिनका आमाको स्वास्थ्य र पोषणका लागि यो कार्यक्रम प्रभावकारी रहेको छ । त्यसैले हामीले यो कार्यक्रमलाई निरन्तरता दिएका छौं ।’
यो भन्दा पहिला छोरी जन्माउने आमालाई एक हजार थप भत्ता दिँदै आएकोमा आगामी बर्षदेखि दुई हजार दिइने उपाध्यक्ष कार्कीले बताइन् ।
यसैगरी सिगास गाउँपालिका, शिवनाथ गाउँपालिका र पञ्चेश्वर गाउँपालिकाले पनि उपाध्यक्षको कोसेली कार्यक्रमलाई निरन्तरता दिएका छन् ।
जिल्लाको दशरथचन्द नगरपालिकाले पनि नगर उपप्रमुख मातृ शिशु सुरक्षा योजनालाई निरन्तरता दिने जनाएको छ ।
यस्ता खालका कार्यक्रमले हजार दिने आमा र बच्चाको स्वास्थ्य र पोषणका लागि महत्वपूर्ण भूमिका खेल्ने सुआहारा बैतडीका जिल्ला संयोजक नागेन्द्रसिंह धामीले जानकारी दिए । उनले भने ‘स्थानीय सरकारहरुले हजार दिनका आमा र बच्चाको स्वास्थ्य र पोषणका बारेमा चासो राख्नु जरुरी छ । स्वस्थ नागरिकका लागि पनि यो बेला ध्यान जानु आवश्यक छ ।’
