दार्चुला- दार्चुलामा  किशोर र किशोरी मृत फेला परेका छन्। जिल्लाको नौगाड गाउँपालिका–४ सिप्टी जाने बाटो बासिडाँडामा अन्दाजी २३÷२४ वर्षका  किशोर र किशोरीको शव फेला परेको हो। किशोरीको शव चोटपटक लागेको अवस्थामा फेला परेको छ ।

किशोरको शव भिरमा अडकिएको छ । जिल्ला प्रहरी कार्यालय दार्चुलाका प्रवक्ता प्रहरी निरीक्षक ज्ञानेन्द्र बहादुर सिंहले युवतीको परिचय खुलेको जानकारी दिए। मृतक किशोरी नौगाड गाउँपालिका–४ की सञ्जिता धामी रहेको खुलेको छ ।  उनको शव भन्दा करिब ४०÷५० मिटर तल भिरमा किशोरको शव अड्किएको अवस्थामा रहेको छ ।

उनको सनाखत हुन सकेको छैन। यस्तै सोही ठाउँमा दुई वटा मोबाइल फोन फेला परेका छन्। एउटा फुटाएको र अर्को नफुटाइएको अवस्थामा फेला परेको हो। अहिले इलाका प्रहरी कार्यालय गोकुलेश्वरका इन्जार्च प्रहरी निरीक्षक गोबिन्द भण्डारी नेतृत्वको टोली घटनास्थलमा छ। घटनाबारे अनुसन्धान भइरहेको प्रहरी निरीक्षक भण्डारीले बताए।