बैतडी –बैतडी जिल्लाको १६ बर्षमुनिको क्रिकेट छनौट प्रतियोगिता शुक्रबारदेखि शुरु हुने भएको छ । प्रत्येक पालिकाहरुबाट आएका खेलाडीबाट टोली बनाएर प्रतिस्पर्धा गराइने बैतडी जिल्ला क्रिकेट संघको सचिव सिद्धराज वोकटीले जानकारी दिए ।
खेलाडीलाई छनौट प्रतियोगितामा सहभागिता गराइदिन सबै पालिकाहरुलाई जिल्ला क्रिकेट संघले पत्राचार गरिसकेको छ । सहभागी हुन आउने खेलाडीलाई अनिवार्य रुपमा उमेर खुल्ने कागजपत्र ल्याउन आग्रह गरिएको बैतडी जिल्ला क्रिकेट संघले जनाएको छ ।
छनौट प्रतियोगिता देहिमाडौंस्थित निंग्लाशैनी खेल मैदानमा सञ्चालन हुनेछ । प्रतियोगितामा उत्कृष्ट प्रदर्शन गरेको आधारमा जिल्लाको टोली घोषणा गर्ने क्रिकेट प्रशिक्षक दीपेन्द्रबहादुर बोहराले बताए । छनौट भएको जिल्लाको टोलीले प्रदेशस्तरीय छनौट प्रतियोगिता खेल्नेछ ।
नेपाल क्रिकेट संघले मलेशियामा हुने १६ वर्षमुनीको इस्ट जोन कप क्रिकेट प्रतियोगितालाई मध्यनजर गर्दै जिल्ला छनौट चैत १५ भित्र गरिसक्न निर्देशन दिएको थियो ।
एसियन क्रिकेट काउन्सिलको कार्यक्रमअनुसार उक्त प्रतियोगिता मे १७ देखि २८ सम्म मलेशियामा हुनेछ । सोही प्रतियोगितामा नेपाल पनि सहभागि हुने नेपाल क्रिकेट संघले जनाएको छ ।
