बैतडी –बैतडी जिल्लास्तरीय १३औं राष्ट्रपति रनिङ शिल्ड प्रतियोगिताको शुक्रबार औपचारिक रुपमा उद्दघाटन गरिएको छ । आज बिहानैदेखि प्रतियोगिता अन्तर्गत एथलेटिक्सका खेलहरु शुरु गरिएका भएपनि प्रतियोगिताको भने दिउँसो औपचारिक कार्यक्रमको आयोजना गरेर उद्दघाटन गरिएको हो ।
बैतडी जिल्ला खेलकुद विकास समितिका अध्यक्ष चमनकुमार भण्डारीको अध्यक्षतामा भएको प्रतियोगिता उद्दघाटन समारोहमा सुदूरपश्चिम प्रदेशसभा सदस्य जानकी ऐर बम प्रमुख अतिथी रहेकी थिइन् । प्रतियोगिताको उद्दघाटन सत्रमा जिल्ला समन्वय समितिका प्रमुख खगेन्द्रसिंह धामी बिशिष्ट अतिथी रहेका थिए ।
यस्तै जिल्लाका १० ओटै स्थानीय तहका प्रमुख तथा प्रतिनिधि, विभिन्न राजनीतिक दलका प्रमुख तथा प्रतिनिधि,प्रशिक्षक,खेलाडी लगायतको उद्दघाटन समारोहमा सहभागिता रहेको थियो ।
फागुन १४ गते सम्म सञ्चालन हुने प्रतियोगितामा १० ओटै स्थानीय तहका टीमहरुको सहभागिता रहेको छ । प्रतियोगिता अन्तर्गत छात्रछात्रा भलिबल, एथलेटिक्स र छात्रछात्रा कबड्डी प्रतियोगिता सञ्चालन हुने जिल्ला खेलकुद विकास समितिले जनाएको छ ।
प्रतियोगिताको विजेता टीमलाई नगद पुरस्कारसहित शिल्ड,ट्रफी र प्रमाणपत्र प्रदान गरिने आयोजकले जनाएको छ ।
प्रतियोगिता उद्दघाटन सत्रमा बोल्दै प्रदेश सभा सदस्य जानकी ऐर बमले खेलकुद क्षेत्रको विकासका लागि आफ्नो तर्फबाट सक्दो पहल गर्ने बताइन् । एक पालिका एक खेलकुद मैदान भन्ने कार्यक्रमलाई प्राथमिकताका साथ अगाडि बढाउनुपर्ने कुरामा उनले जोड दिइन् । यसका साथै खेलकुद क्षेत्रको विकासका लागि स्थानीय सरकारले पनि ध्यान दिनुपर्ने उनले बताइन् ।
प्रदेशसभाबाट खेलकुद क्षेत्रको विकासका लागि आवश्यक निती, नियम र कानुन निर्माणका लागि आफूले पहल गर्ने पनि प्रदेश सभा सदस्य बमले बताइन् ।
उद्दघाटन सत्रमा आयोजकका तर्फबाट अतिथीहरुलाई मायाको चिनो समेत प्रदान गरिएको छ ।
