कैलाली –कैलालीमा अवरुद्ध पारिएको पूर्वपश्चिम राजमार्ग खुलेको छ । बिहानैदेखि राजमार्ग अवरुद्ध पारिएकोमा बुधबार साँझदेखि राजमार्ग सुचारु भएको प्रहरीले जनाएको छ ।
बुधबार बिहान जिल्लाको गोदावरी नगरपालिकास्थित लालपुरमा भएको दुर्घटनापछि स्थानीयले सडक अवरुद्ध पारेका थिए । टिपरले अटोरिक्सालाई ठक्कर दिँदा ३ बर्षीय बालक भरत ठकुल्लाको मृत्यु भएको थियो । सो दुर्घटनामा परेर मृतककी आमा २९ बर्षीया पेन्टी ठकुल्ला र अटोचालक २८ बर्षीय मोहन बोहरा घाइते भएका छन् ।
आज लालपुरमा पूर्वबाट पश्चिमतर्फ आइरहेको सुपप्र ०१००१ क २०२० नम्बरको टिप्परले सुपप्र ०१००१ ह ४९१८ को अटोलाई ठक्कर दिएको हो ।
टिपर चालक धनगढी उपमहानगरपालिका ७ बस्ने ४२ वर्षीय प्रदिप चौधरी र टिपरलाई इलाका प्रहरी कार्यालय मालाखेतीले नियन्त्रणमा लिएको छ ।
पीडित पक्षलाई क्षतिपुर्ति दिलाउने, घाइतेको उपचार गर्ने र दुर्घटना क्षति भएको अटो मर्मत गर्ने सहमतिपछि सडक खुलाइएको प्रहरीले जनाएको छ ।
