डोटी –नेकपा एमालेका अध्यक्ष केपी शर्मा ओलीले विगतमा आफूले टिकट दिएर जिताएको व्यक्ति प्रेम आलेले डोटीको मात्र नभएर देशकै बेइज्जत गरेको बताएका छन् । डोटीको चुनावी सभालाई सम्बोधन गर्दै एमाले अध्यक्ष ओलीले अब कुनै गल्ती नगर्न डोटेली कांग्रेसलाई आह्वान गरेका छन् ।
चुनावी आमसभलाई सम्बोधन गर्न डोटीको सदरमुकाम दीपायलमा पुगेका ओलीले कांग्रेसका नेतालाई कैलाली झारेर अश्लील बोल्ने तथा पार्टी तथा जनताको विश्वासमाथि घात गर्ने व्यक्तिलाई उम्मेदवार बनाएकाले यसपटक डोटेलीले विचार पु¥याउनुपर्नेमा उनले जोड दिए ।
ओलीले नेपाली कांग्रेसले चितवनमा मात्र नभएर अब डोटीमा पनि रुखमा भोट हाल्नबाट कार्यकर्तालाई वञ्चित गरेको भन्दै कांग्रेस सुधार्न एमालेलाई मत दिन आग्रह गरे । उनले वीरबहादुर बलायरतर्फ संकेत गर्दै आफ्नो नेतालाई हार्नका लागि कैलालीतिर झारेर अराजक र अश्लील बोल्ने व्यक्तिलाई टिकट दिएको आरोपसमेत लगाए ।
अध्यक्ष ओलीले डोटीबाट प्रतिनिधि सभा सदस्यमा सशक्त महिला उम्मेदवार गौरी वलीलाई जिताएर पठाउन आग्रह गरे । एमालेले आलेविरुद्ध गौरीलाई खडा गरेको छ भने प्रदेशमा चक्र मल्ल र टेकबहादुर बमलाई उम्मेदवार बनाएको छ । जिल्लामा नरेन्द्र खड्काले स्वतन्त्र उम्मेदवारी दिएका छन् ।
