कैलाली –कैलालीमा करीब १६ लाख असुलेर ठगी गरेको आरोपमा दार्चुलाका एक युवक पक्राउ परेका छन् । दार्चुलाको मार्मा स्थायी घर भई गोदावरी नगरपालिका–९ को खुटिया बस्ने ३६ वर्षीय डम्बरबहादुर ठगुन्ना ठगी आरोपमा पक्राउ परेका हुन् ।
पीडित पक्षले दिएको किटानी जाहेरीका आधारमा आइतबार राति ठगुन्नालाई खुटियास्थित डेराबाट पक्राउ गरिएको प्रहरीले जनाएको छ । ठगुन्नाले चुरे गाउँपालिका–५ को सिस्नेरी, गोदावरी नगरपालिका र कञ्चनपुरको भीमदत्त नगरपालिकाका समेत गरेर ३५ जनालाई ठगी गरेको पाइएको छ । ठगुन्नाले उनीहरुबाट ४५ हजारका दरले रकम लिएर कैलालीको गौरीगंगा नगरपालिकामा एक कठ्ठा ऐलानी जग्गा खरिद गरिदिएको भन्दै नक्कली लालपुर्जा थमाएको पाइएको हो ।
भूमि आयोगमा आफ्नो पहुँच भएको बताउँदै रकम लिएर नक्कली लालपुर्जा बाडेपछि १५ लाख ७५ हजार रुपैयाँ लगेर फरार भएका ठगुन्नालाई पीडितले समातेर प्रहरीको जिम्मा लगाएका हुन् ।
ठगुन्नाबाट पीडित भएका १० जनाले दिएको उजुरीका आधारमा उनीमाथि अनुसन्धान भइरहेको छ ।
