बैतडी –शिवांश हेल्प फाउण्डेसनले बैतडीमा सञ्चालन गरेको खाद्यान्न सहयोग अभियानमा बैतडीका युवा सुरेश अवस्थीले ५० हजार नगद सहयोग गरेका छन् । कोरोना कहरका कारण समस्यामा परेका नागरिकलाई खाद्यान्न सहयोग गर्न सञ्चालन गरिएको अभियानमा अवस्थीले पचास हजार नगद सहयोग गरेको शिवांश हेल्प फाउण्डेसनका अध्यक्ष महेश अवस्थीले बताए ।
बैतडीको सुर्नया गाउँपालिका ६ कोखेत घर भएका अवस्थीले आफूले रोजगारीको सिलसिलामा कोरियामा बस्दा कमाएको पैसाबाट खाद्यान्न सहयोग अभियानमा साथ दिएको बताए । उनले भने ‘अहिलेको समयमा कतिपय नागरिकलाई दुई छाक टार्न धौ धौ छ । त्यसैले समस्यामा परेका नागरिकलाई सहयोग होस भनेर मैले पनि अभियानमा साथ दिएको हुँ ।’
समस्यामा परेका नागरिकको दुःख आफूले आफ्नै आँखाले देखेकाले खाद्यान्न सहयोग अभियानमा नगद सहयोग गरेको अवस्थीले बताए । उनले भने ‘कोरोना कहरका कारण कतिपयका बालबच्चा भोकै बस्न बाध्य छन् । उनीहरुलाई सहयोग पुगोस भनेर मैले पनि सहयोग गरेको हुँ । यसरी सहयोग गर्न पाउँदा निकै खुसी लागेको छ ।’
शिवांश हेल्प फाउण्डेसन मार्फत सञ्चालन गरिएको अभियानमा दुई लाख बढीको खाद्यान्न वितरण गरिने फाउण्डेसनका अध्यक्ष अवस्थीले बताए । स्थानीय तहमा रहेका कमजोर आर्थिक अवस्था भएका परिवारलाई खाद्यान्न वितरण गरिने बताइएको छ ।
प्रत्येक स्थानीय तहमा २१ परिवारलाई २५ केजी चामल वितरण गर्ने हिसाबले तयारी भईरहेको अवस्थीले बताए ।
