कञ्चनपुर–कञ्चनपुरको महाकाली सिँचाइ आयोजना तेस्रो चरणअन्तर्गत ब्रह्मदेवबाट शुक्लाफाँटाको टोटी फुलेलीसम्म २८ किलोमिटर मूल नहर निर्माण सम्पन्न भइसकेको छ ।
थप खण्डमा झन्डै ६० प्रतिशत भौतिक प्रगति भएको आयोजनाका सूचना अधिकारी इन्जिनियर यादव बरालले जानकारी दिए । तर महाकाली नदीबाट भारतले परीक्षणका लागि मात्र पानी छोडेको र नियमित प्रवाह नभएका कारण सिँचाइ सुविधा पुग्न सकेको छैन ।
आयोजनाले यस विषयमा तीन पटक जलस्रोत तथा सिँचाइ विभागमार्फत भारतसँग समन्वय गर्न पत्राचार गरे पनि नेपाल–भारत सिँचाइ मन्त्रीस्तरमा विषय पुग्न नसकेको बरालले बताए । कूटनीतिक पहल हुन नसक्दा ९ अर्ब रुपैयाँभन्दा धेरै लगानीमा बनेको मूल नहर काठ र घाँसले पुरिन थालेको उनले बताए ।
कञ्चनपुर उद्योग वाणिज्य सङ्घका अध्यक्ष दिनेश मल्लले नयाँ सरकारले यो विषय चाँडै टुङ्गोमा पु¥याउने आशा व्यक्त गर्दै छिमेकी देशसँग कूटनीतिक पहलमा थप ढिलाइ गर्न नहुने बताए ।
आयोजना पूर्ण भएमा कञ्चनपुर र कैलालीको मालाखेतीसम्म ३३ हजार ५२० हेक्टर जमिनमा सिँचाइ सुविधा पुग्ने र किसानको जीवनस्तरमा सकारात्मक परिवर्तन आउने अपेक्षा गरिएको छ ।
