बैतडी–बैतडीको सुर्नया गाउँपालिकाको प्रमुख प्रशासकीय अधिकृतमा जीतेन्द्र विकलाई खटाइएको छ । संघीय मामिला तथा सामान्य प्रशासन मन्त्रालयले सञ्चार तथा सूचना मन्त्रालय अन्तर्गत कार्यरत शाखा अधिकृत विकलाई गाउँपालिकाको प्रमुख प्रशासकीय अधिकृतमा खटाएको हो ।
मन्त्रालयले स्थानीय सरकार सञ्चालन ऐन २०७४ को दफा ८४ को उपदफा ४ बमोजीम माघ २ गतेको निर्णय अनुसार विकलाई गाउँपालिकामा खटाएको जनाएको छ ।
यसअघि गाउँपालिकामा प्रमुख प्रशासकीय अधिकृत नहुँदा आर्थिक तथा प्रशासनिक कामकाजहरु ठप्प रहेका छन् । मन्त्रालयले नयाँ प्रमुख प्रशासकीय अधिकृत खटाएपछि अब काम अघि बढ्ने अपेक्षा गरिएको गाउँपालिकाका अध्यक्ष अम्मरबहादुर कुँवरले बताए ।
सुर्नया गाउँपालिका गएको कार्तिक २६ गतेदेखि प्रमुख प्रशासकीय अधिकृत विहिन रहेको छ । गाउँपालिकामा प्रमुख प्रशासकीय अधिकृत नहुँदा सबै कामकाज ठप्प भएपछि अध्यक्ष कुँवरले मन्त्रालयमै पुगेर प्रमुख प्रशासकीय अधिकृत खटाइदिन आग्रह गरेका थिए ।
गाउँपालिकामा लामो समयदेखि प्रमुख प्रशासकीय अधिकृत नहुँदा कर्मचारीहरुको तलबभत्ता, सामाजिक सुरक्षा भत्ता लगायतका निकासा रोकिएका छन् । यस्तै विकास निर्माणका कामहरु समेत अगाडि बढाउन समस्या भइरहेको छ ।
मन्त्रालयले खटाएका विक गाउँपालिकामा हाजिर भएपछि कामहरु अघि बढ्ने गाउँपालिका अध्यक्ष कुँवरले बताए ।
