बैतडी –२५औँ सशस्त्र प्रहरी दिवसको अवसर पारेर सशस्त्र प्रहरी बल नेपाल, ५१ नम्बर गुल्म बैतडीले लागूऔषध सम्बन्धी निबन्ध लेखन तथा वक्तृृत्वकला प्रतियोगिताको आयोजना गरेको छ ।
दिवसको पूर्वसन्ध्यामा बैतडीको वीरेन्द्र माध्यमिक विद्यालयमा आयोजित कार्यक्रममा लागूऔषध दुरुपयोग, सीमा सुरक्षा र युवाको भूमिकाबारे केन्द्रित विषयमा विद्यार्थीबीच प्रतिस्पर्धा गराइएको गुल्मपति जंगबहादुर कुँवरले जानकारी दिए ।
वक्तृत्वकला प्रतियोगितामा डम्बरी नाथ प्रथम, रमन पाण्डेय द्वितीय र लक्ष्मी भट्टले तृतीय स्थान हासिल गर्न सफल भएको गुल्मपति कुँवरले बताए ।
यस्तै, निबन्ध लेखन प्रतियोगितामा कामना भट्ट प्रथम, ज्योती पाण्डेय द्वितीय र जान्हबी खत्री तृतीय भएका छन् । प्रतियोगितामा उत्कृष्ट हुने विद्यार्थीहरूलाई पुरस्कार प्रदान गरिएको थियो । कार्यक्रममा प्रमुख जिल्ला अधिकारी पुण्यविक्रम पौडेल, विभिन्न सुरक्षा निकायका प्रमुखहरू, विद्यालयका प्रधानाध्यापक हर्कबहादुर चन्दलगायतको उपस्थिति रहेको थियो ।
यस्तै लागू औषध दुर्व्यसन विरुद्ध सडक नाटक पनि प्रदर्शन गरिएको गुल्मपति कुँवरले बताए ।
बैतडीस्थित सशस्त्र प्रहरी बल नेपाल, ५१ नम्बर गुल्मले आउँदो माघ ९ गते औपचारिक रूपमा २५औँ सशस्त्र प्रहरी दिवस मनाउने जनाएको छ ।
