बैतडी –बैतडीको मेलौली नगरपालिकाले वडा–वडामा पुगेर योजनाको सम्झौता गर्ने कार्य शुरु गरेको छ । चालु आर्थिक बर्षको स्वीकृत वार्षिक बजेट तथा कार्यक्रम अनुसार नगरपालिका तथा वडाले छनोट गरेका उपभोक्ता समिति मार्फत गरिने योजनाहहरुको वडामै पुगेर सम्झौता गर्ने कार्य भइरहेको नगरपालिकाका प्रमुख प्रशासकीय अधिकृत दलबहादुर धामीले बताए । गाउँपालिकाले वडाबाटै योजना सम्झौता गर्न थालेपछि उपभोक्ताहरुलाई पनि सहज भएको छ ।

नगरपालिकाको कार्यालयबाट विनियोजन भएका पालिकास्तरीय योजना र वडाबाट छनोट भएका वडास्तरीय योजनाको सम्झौता सम्बन्धित वडाबाटै गर्ने गरिएको प्रमुख प्रशासकीय अधिकृत धामीले बताए । 

पालिकाले छनोट गरेका र वडाले छनोट गरेका योजनाको एकैदिन सम्बन्धित वडाबाटै सम्झौता गर्ने गरिएको छ । प्रमुख प्रशासकीय अधिकृत, योजना शाखाका कर्मचारी, इञ्जिनियर पालिकाबाट वडामा जाने र सम्बन्धित वडाध्यक्ष, सचिव तथा छनोट भएका योजनाका उपभोक्ता समितिका पदाधिकारीकाबीच कार्य सम्झौता गरिएको छ ।

९ वटा वडा रहेको पालिकामा वडा नम्बर ४ बाट योजना सम्झौता गर्ने कार्य शुरु गरिएको मेलौली नगरपालिकाले जनाएको छ । 

योजनाहरुको सम्झौताका लागि नगरपालिका धाउँदा उपभोक्ताहरुलाई अप्ठ्यारो हुने भएकाले वडामै पुगेर योजनाको सम्झौता गर्ने गरिएको नगर प्रमुख भीमबहादुर चन्दले बताए । 

वडामा पुगेर योजनाको सम्झौता गर्नुका साथै उपभोक्ता समितिका पदाधिकारीहरुलाई योजनाका बिषयमा अभिमुखीकरण दिने कार्य समेत भइरहेको छ ।