बैतडी–बैतडी कारागारमा रहेका कैदी र थुनुवालाई स्थानान्तरण गरिएको छ । जीर्ण अवस्थामा रहेको भवनलाई नयाँ निर्माण गरिने भएकाले यहाँ रहेका कैदी र थुनुवालाई देशका विभिन्न स्थानमा रहेका कारागारमा स्थानान्तरण गरिएको हो ।
कारागारको बन्दीगृहमा रहेका ५३ जना कैदीबन्दी र ६ जना थुनुवालाई अन्यत्र स्थानान्तरण गरिएको कारागार कार्यालय बैतडीकी प्रमुख धारा भण्डारीले बताइन् ।
५३ जना कैदीबन्दीमध्ये तीन जनालाई दार्चुला, ९ जनालाई बझाङ, १४ जनालाई डडेल्धुरा र २७ जनालाई बाँकेको नौबस्ता कारागारमा स्थानान्तरण गरिएको भण्डारीले बताइन् ।
यस्तै ६ जना थुनुवालाई दार्चुला कारागार पठाइएको छ । नयाँ आउने थुनुवाहरुलाई डडेल्धुरा पठाउने गरिएको भण्डारीले बताइन् ।
बैतडी कारागारमा ८५ जना क्षमताको नयाँ बन्दीगृह निर्माण कार्य शुरु हुने भएकाले कैदीबन्दी र थुनुवाहरुलाई स्थानान्तरण गरिएको हो । कार्तिक अन्तिम साता उनीहरुलाई स्थानान्तरण गरिसकिएको भण्डारीले बताइन् ।
बन्दीगृह निर्माणका लागि रु १० करोड बजेट विनियोजन गरिएको छ । केकेजे कालिका एस बी जेभी सुकेधाराले बन्दीगृह निर्माणको काम शुरु गर्ने तयारी गरेको छ । सो कम्पनीसँग रु सात करोड ९७ लाख ७१ हजार ४१९ रुपैयाँ बन्दीगृहमा निर्माणका लागि सम्झौता भएको सघन सहकरी तथा भवन निर्माण आयोजना कार्यालय डोटीले जनाएको छ ।
निर्माण कम्पनीले चाँडै काम शुरु गर्ने जनाएको छ । २०८४ असार १५ गतेभित्र नयाँ बन्दीगृह निर्माण गरिसक्ने लक्ष्य रहेको बताइएको छ ।
