बैतडी–नेपाल शिक्षक महासंघले बैतडीका १० ओटै स्थानीय तहमा दुई घण्टा धर्ना दिँदै ज्ञापन पत्र बुझाएको छ ।
शिक्षक महासंघमा आवद्ध सबै संगठनका प्रतिनिधिहरुको सहभागितामा शुक्रबार स्थानीय तहहरुमा धर्ना दिँदै ज्ञापन पत्र बुझाएको आन्दोलन परिचालन जिल्ला समितिका संयोजक एवं नेपाल शिक्षक संघ बैतडीका अध्यक्ष गणेशसिंह भण्डारीले बताए ।
सरकारले ल्याएको विद्यालय शिक्षा विधेयकमा यसअघि महासंघसँग भएका सम्झौता कार्यान्वयन नभएकाले आफूहरु आन्दोलनमा उत्रेको भण्डारीले बताए ।
नेपाल सरकार र नेपाल शिक्षक महासंघबीच भएको सम्झौता पूर्ण रुपमा कार्यान्वयन हुनुपर्ने आफूहरुको माग गरेको नेपाल शिक्षक संघ सुर्नयाका अध्यक्ष गणेशदत्त अवस्थीले बताए ।
सरकारले ल्याएको विद्यालय शिक्षा विधेयकमा अस्थायी प्रकृतिका शिक्षकहरुको व्यवस्थापनमा ध्यान नदिएको बताइएको छ । यस्तै स्थायी शिक्षकहरुको आवधिक बढुवाको बिषय पनि सहमति अनुसार विधेयकमा नराखिएको अवस्थीले बताए ।
यस्तै शिक्षकहरुलाई विभागीय कारवाही गर्ने अधिकार स्थानीय तहमा राख्ने कुरा विधेयकमा उल्लेख गरिएको र यो आफूहरुलाई स्वीकार्य नभएको भण्डारीले बताए ।
विद्यालय कर्मचारी, बालविकास शिक्षकका बिषयमा भएको सहमतिलाई विधेयकले लत्याएको शिक्षकहरुले बताएका छन् । यस्तै संस्थागत विद्यालयहरुका बिषयमा भएको सहमति पनि विधेयकमा लत्याएको शिक्षक महासंघले जनाएको छ ।
नेपाल शिक्षक महासंघको केन्द्रीय कार्यक्रम अनुसार स्थानीय तहबाटै संघर्षका कार्यक्रम शुरु गरिएको र माग पूरा नभए सशक्त आन्दोलनका कार्यक्रम अगाडि बढाइने भण्डारीले बताए ।
