बैतडी–बैतडीको सुर्नया गाउँपालिका–८ सेला स्थित गणेश आधारभूत विद्यालयको भवनमा पहिरोले क्षति पुर्याएको छ । सोमबार रातिको बर्षासंगै विद्यालय भवनको माथिबाट खसेको पहिरोले क्षति पुर्याएको विद्यालयका शिक्षक प्रतापसिंह मडैले बताए ।
पहिरोले दुई कोठे भवनको झ्यालमा क्षति पुगेको छ भने कक्षाकोठाभरी लेदो भरिएको छ । पहिरोको लेदो कक्षाकोठाभित्र पसेपछि पठनपाठनमा समस्या भएको शिक्षक मडैले बताए ।
बर्षातको शुरुमै खसेको पहिरोले क्षति पुर्याउँदा भवन नै पहिरोको जोखिममा परेको छ । लेदोसहितको पहिरोले कक्षाकोठाभित्र रहेका डेस्क,बेञ्चहरुमा समेत क्षति पुर्याएको शिक्षक मडैले बताए ।
कक्षा ५ सम्मको पढाइ हुने उक्त विद्यालयको भवनमा पहिरोले क्षति पुर्याएपछि अब कक्षाकोठाको अभाव भएको स्थानीय रामबहादुर साउँदले बताए ।
यस्तै सेलाकै अर्जुन साउँदको घर पनि पहिरोको जोखिममा परेको छ । घरको तल र माथि दुवैतिरबाट पहिरो खसेपछि घर जोखिममा परेको साउँदले बताए ।
यस्तै सुर्नया गाउँपालिका–७ झाड्बोका शेरबहादुर महराको १० कोठे पक्की घर पहिरोको जोखिममा परेको छ । गत बर्ष नै पहिरोको जोखिममा रहेको उक्त घर जोगाउनका लागि घरको तलतिर तारजालीसहित पर्खाल लगाइएको थियो । सोमबार रातिको बर्षाले ५ लाखको लागतमा निर्माण गरिएको तारजालीसहित पर्खाल भत्काएको महराले बताए ।
पर्खाल भत्काएपछि महरा परिवारलाई समस्या भएको छ ।
