बैतडी–बैतडीको सुर्नया गाउँपालिका –७ स्थित भुवनेश्वर मावि चौथलीको भवन पहिरोको जोखिममा परेको छ ।
सुर्नया गाउँपालिका वडा नं ७ को कार्यालयको आँगनबाट खसेको पहिरोका कारण विद्यालयको चारकोठे भवन जोखिममा परेको विद्यालयका शिक्षक उत्तमबहादुर कुँवरले बताए ।
आँगनबाट पहिरो खसेपछि वडा कार्यालयको भवन पनि जोखिममा रहेको छ ।
माथिबाट खसेको पहिरोले विद्यालयका चारओटा कोठामा लेदो भरिएको शिक्षक कुँवरले बताए । पहिरोले कक्षाकोठामा केही क्षति पुगेको उनले बताए ।
सोमबार रातिको बर्षाका कारणले पहिरो खसेको बताइएको छ । पहिरो खसेपछि विद्यालय भवनका कोठाभित्र जानै मुस्किल भएको छ ।
भवनको अभाव रहेको भुवनेश्वर माविमा पहिरोले झन् समस्या निम्त्याएको विद्यालयका प्रधानाध्यापक नन्दराम अवस्थीले बताए । भवन अभावमा संयुक्त कक्षा सञ्चालन गर्ने गरिएको र पहिरोले भएका कोठाहरुमा समेत क्षति पुर्याएपछि पठनपाठनमा समस्या भएको उनले बताए ।
बर्षातको समयमा माथिबाट झन् पहिरो खस्ने जोखिम बढेको शिक्षक कुँवरले बताए । पहिरोको लेदो कोठाभित्र पसेपछि बालबालिकाहरुको दिवाखाजा पकाउने भाँडाकुँडामा केही क्षति पुगेको बताइएको छ ।
पहिरो रोकथामका लागि तत्काल उपाय अपनाउन नसकिए थप क्षति हुनसक्ने शिक्षक कुँवरले बताए । पहिरोले बालबालिकाहरुको पढाइ प्रभावित भएको उनले बताए ।
