बैतडी–बैतडीको दोगडाकेदार गाउँपालिकाले आगामी आर्थिक बर्ष २०८२÷८३ का लागि ५२ करोड ६८ लाख ७४ हजार ६ सय ६४ रुपैयाँको अनुमानित बजेट ल्याएको छ ।
मंगलबार गाउँपालिकाको १५ औं गाउँसभाको दोश्रो बैठकमा उपाध्यक्ष पार्वती ऐरी कार्कीले उक्त बजेट पेश गरेकी हुन् । गाउँपालिकाले चालु र पूँजीगततर्फ गरि ५२ करोड ६८ लाख ७४ हजार ६ सय ६४ रुपैयाँको बजेट ल्याएको हो ।
गाउँपालिकाले नेपाल सरकारबाट प्राप्त हुने वित्तीय समानीकरण अनुदानतर्फ ९ करोड ७७ लाख र सुदूरपश्चिम प्रदेश सरकारबाट प्राप्त हुने समानीकरण अनुदानतर्फ ८३ लाख ९६ हजार रुपैयाँ आम्दानी हुने प्रक्षेपण गरेको छ ।
यस्तै नेपाल सरकारबाट प्राप्त हुने राजस्व बाँडफाँडतर्फ ९ करोड ४ लाख ५३ हजार ६ सय ६४ रुपैयाँ , प्रदेश सरकारबाट प्राप्त हुने राजस्व २० लाख २५ हजार रुपैयाँ, नेपाल सरकारबाट प्राप्त हुने सशर्त अनुदान तर्फ २७ करोड १७ लाख रुपैयाँ र प्रदेश सरकारबाट प्राप्त हुने सशर्त अनुदान तर्फ रु ३ करोड २४ लाख रुपैयाँ आम्दानी हुने अनुमान गरिएको उपाध्यक्ष कार्कीले बताइन् ।
यस्तै गाउँपालिकाको आन्तरिक आयतर्फ १ करोड आम्दानी हुने अनुमान गरिएको बजेट वक्तव्यमा उल्लेख गरिएको छ ।
