बैतडी–मोटरसाइकलले ठक्कर दिँदा गम्भीर घाइते भएकी बैतडीकी ३० बर्षीया हरु साउँदको निधन भएको छ ।
जिल्लाको शिवनाथ गाउँपालिका–४ कुङेफाँटा घर भएकी साउँदलाई कैलालीको अत्तरीयमा यही वैशाख २३ गते मोटरसाइकलले ठक्कर दिएको थियो । मोटरसाइकलको ठक्करबाट गम्भीर घाइते भएकी साउँदको उपचारका क्रममा आज मायामेट्रो अस्पताल धनगढीमा मृत्यु भएको स्थानीय दशरथ चाडले बताए ।
बच्चाहरुलाई पढाउनका लागि यही वैशाख २३ गते घरबाट अत्तरीया गएकी साउँदलाई सोही दिन साँझ मोटरसाइकलले ठक्कर दिएको थियो । मृतक साउँदका दुई छोरा रहेका छन् ।
मृतक साउँदका श्रीमान हिक्मत साउँद रोजगारीको सिलसिलामा साउदी अरबमा रहेका र आजमात्रै नेपाल आइपुगेका चाडले बताए ।
साउँदलाई ठक्कर दिने मोटरसाइकल चालकलाई प्रहरीले सोही दिन नियन्त्रणमा लिएको थियो ।
बालबच्चा पढाउनका लागि अत्तरीया पुगेकी साउँदको निधन भएपछि घरपरिवारको विचल्ली भएको छ ।
