बैतडी–बैतडीको जगन्नाथ बहुमुखी क्याम्पस गोठलापानीको स्ववियु सभापतिमा नेपाल विद्यार्थी संघका रोशन भट्ट प्यानलसहित विजयी भएका छन् । आज सम्पन्न भएको स्ववियु निर्वाचन अन्तर्गत १ सय १ मत ल्याएर भट्ट सभापतिमा निर्वाचित भएका हुन् । उनका प्रतिस्पर्धी अनेरास्ववियुका उमेश बडूले ५० मत ल्याए ।
यस्तै सचिवमा नेविसंघकी राधा बोहरा ८५ मत ल्याएर विजयी भइन् भने उनकी प्रतिस्पर्धी अनेरास्ववियुकी रेखा चुनाराले ५१ मत ल्याइन् । कोषाध्यक्ष पदमा विजयी भएकी नेविसंघकी मीना चन्दले ९१ मत ल्याउँदा अनेरास्ववियुका नवीन भट्टले ५५ मत ल्याए ।
सदस्यमा नेविसंघका करीना कार्की (९६), गौरव लेखक (१००), गोविन्द कोली (१००) र रोमन नेपाली (९९) मत ल्याएर विजयी भएका छन् ।
सुदूरपश्चिम विश्वविद्यालयको आंगिक क्याम्पस जगन्नाथ बहुमुखी क्याम्पसमा यसअघि पनि स्ववियु निर्वाचनमा नेविसंघले जित हात पारेको थियो । यो क्याम्पसमा नेविसंघले लगातार जित दर्ता गर्दै आएको छ ।
यस्तै समानुपातिकतर्फ नेविसंघले १ सय ४ मत र अनेरास्ववियुले ४९ मत प्राप्त गरेको नवनिर्वाचित स्ववियु सचिव राधा बोहराले बताइन् ।
