बैतडी–बैतडीको दशरथचन्द नगरपालिका–२ स्थित प्रसिद्ध निङ्गलाशैनी भगवती मन्दिरमा पशु बलिसहित शनिबार जात्रा सम्पन्न भएको छ ।
शुक्रबारदेखि शुरु भएको जात्रा आज सम्पन्न भएको निङ्गलाशैनी भगवती धार्मिक सेवा समितिका कार्यवाहक अध्यक्ष एवं मन्दिरका भण्डारे चक्रबहादुर बोहराले बताए ।
यो मन्दिरमा हरेक बर्ष वासन्तिक नवरात्रमा पनि पशु बलिसहित जात्रा लाग्ने गरेको छ । प्रतिपदादेखि पूजाआजा शुरु भइ चैत्राष्टमीका दिन पशु बलिसहित जात्रा सम्पन्न हुने गरेको बोहराले बताए ।
निङ्गलाशैनी भगवती मन्दिरमा १ सय ६८ राँगा र झण्डै २ सय बोकाको बलि दिइएको जिल्ला प्रहरी कार्यालय बैतडीका प्रहरी निरीक्षक बल्देव बडूले बताए ।
निङ्गलाशैनी भगवती मन्दिरमा असोज र चैतको जात्रामा राँगा र बोकाको बलि दिने प्रचलन रही आएको छ ।
जात्रामा नेपालका मात्रै नभएर सीमावर्ती भारतीय दर्शनार्थीहरुको समेत सहभागिता रहने गर्दछ । भाकल अनुसार बलि दिने प्रचलन रही आएको भण्डारे बोहराले बताए ।
यो क्षेत्रको प्रमुख शक्तिपीठको रुपमा रहेको निङ्गलाशैनी भगवती मन्दिरमा बर्षको चार पटक जात्रा लाग्ने गर्दछ । शरदीय नवरात्र र वासन्तिक नवरात्रमा बलिसहित यो मन्दिरमा जात्रा हुने गर्दछ ।
यस्तै भाद्र शुक्ल चतुर्दशी अर्थात अनन्त चतुर्दशी र मंसिर शुक्ल पूर्णिमा अर्थात धान्य पूर्णिमाका दिन पनि मन्दिरमा जात्रा हुने गरेको छ । यी दुई जात्रामा भने बलि दिने चलन नरहेको निङ्गलाशैनी भगवती धार्मिक सेवा समितिले जनाएको छ ।
