बैतडी –बैतडीको सुर्नया गाउँपालिकाले कक्षा ८ को पालिकास्तरीय परीक्षाको नतिजा सार्वजनिक गरेको छ ।
गाउँपालिकाको शिक्षा शाखाले शुक्रबार प्रकाशन गरेको नतिजा अनुसार परीक्षमा सहभागी भएका परीक्षार्थीमध्ये ५० प्रतिशतमात्रै उत्तीर्ण भएका छन् । परीक्षा सहभागी भएका १९ ओटा विद्यालय मध्ये दुईओटा विद्यालयको नतिजा शून्य आएको छ । वडा नं ४ स्थित उदयदेव मावि पालिगडा र वडा नं ७ स्थित भुवनेश्वर मावि चौथालीको नतिजा शून्य आएको हो । उदयदेव माविबाट ८ जना परीक्षार्थी सहभागी भएकोमा ८ जना नै अनुत्तीर्ण भएका छन् भने भुवनेश्वर माविबाट १० जना परीक्षार्थी सहभाथी भएकोमा १० जना नै अनुत्तीर्ण भएका छन् ।
पालिकाभरी ३ सय ९६ जना परीक्षामा सहभागी भएकोमा १ सय ९८ जना मात्रै उत्तीर्ण भएका गाउँपालिकाका शिक्षा शाखा प्रमुख टंकप्रसाद अवस्थीले बताए ।
प्रकाशित परीक्षाफल अनुसार बढीमा दुई बिषयमा एनजी आएका विद्यार्थीहरुले स्तरवृद्धि परीक्षा दिन पाउने शिक्षा शाखा प्रमुख अवस्थीले बताए । स्तरवृद्धि परीक्षामा सहभागी हुने विद्यार्थीहरुले चैत मसान्तभित्र परीक्षा फारम भरिसक्नुपर्ने जनाएको छ ।
आगामी वैशाख २१ र २२ गते स्तरवृद्धि परीक्षा सञ्चालन गर्ने गाउँपालिकाले जनाएको छ । गाउँपालिको प्रकाशन गरेको नतिजामा चित्त नबुझे पुनर्योग गर्न चाहने विद्यार्थीहरुले एक हप्ताभित्र सम्बन्धित विद्यालयमा निवेदन दिन सक्ने शिक्षा शाखा प्रमुख अवस्थीले बताए ।
सुर्नया गाउँपालिकाले यो बर्ष आधारभूत तह कक्षा ८ को पालिकास्तरीय परीक्षा गएको फागुन २६ गतेदेखि चैत ५ गतेसम्म सञ्चालन गरेको थियो । ८ ओटा केन्द्र निर्धारण गरेर परीक्षा सञ्चालन गरिएको थियो । आधारभूत तहको शैक्षिक गुणस्तर सुधारका लागि पालिकास्तरीय परीक्षा सञ्चालन गरिएको गाउँपालिकाले जनाएको छ ।
