बैतडी –बैतडीको पुर्चौंडी नगरपालिकामा क्षयरोगका बिरामीहरुको खोजीका लागि मंगलबारदेखि खोजपड्ताल शिविर शुरु भएको छ ।
पुर्चौंडी नगरपालिका वडा नं ५ स्थित भूमीराज मावि गहताडमा मंगलबार शिविरको उद्दघाटन गरिएको पुर्चौंडी नगरपालिकाका जनस्वास्थ्य निरीक्षक सुरेन्द्रप्रसाद अवस्थीले जानकारी दिए ।
स्वास्थ्य निर्देशनालय दिपायलको प्राविधिक सहयोग र पुर्चौंडी नगरपालिकाको आयोजनामा शिविर सञ्चाल गरिएको हो । शिविरमा एआइ जडित डिजिटल एक्सरेमार्फत सम्भावित लक्षण तथा चिन्ह भएका व्यक्तिहरुको एक्सरे गर्ने गरिएको अवस्थीले बताए ।
पहिलो दिन २ सय ८९ जनाको छातीको एक्सरे गर्दा ४६ जनाको छातीमा दाग देखिएको छ । एक्सरे गर्दा दाग देखिएका ४६ जनाको खकार संकलन गरेर जिन एक्सपर्टका लागि जिल्ला अस्पताल पठाइएको अवस्थीले बताए । जिल्ला अस्पतालको प्रयोगशालामा खकार जाँच भएपछि उनीहरुमा क्षयरोग भए ÷नभएको पत्ता लाग्ने उनले बताए ।
समुदायमा रहेका क्षयरोगका बिरामीहरुको खोजीका लागि शिविरमार्फत सेवा दिने काम भइरहेको जनस्वास्थ्य निरीक्षक अवस्थीले बताए ।
बुधबार वडा नं ३ स्थित विणेश्वर मावि नकालीमा शिविरको आयोजना हुनेछ भने बिहीबार वडा नं ९ स्थित तल्लादेही स्वास्थ्यचौकीमा शिविरको आयोजना गरिने अवस्थीले बताए ।
यस्तै चैत २२ गते वडा नं १ स्थित हाट स्वास्थ्यचौकीमा शिविरको आयोजना गरिनेछ भने चैत २३ गते वडा नं ६ स्थित भूमीराज मावि कफलढुंग्रामा शिविरको आयोजना गरिने बताइएको छ ।
पुर्चौडी नगरपालिकालाई क्षयरोगमुक्त पालिका बनाउनका लागि गतबर्षदेखि कार्यक्रम सञ्चालनमा रहेको छ । पुर्चौंडी नगरपालिकामा हाल १९ जना क्षयरोगका बिरामी उपचारमा रहेका छन् ।
मंगलबार एक कार्यक्रमकाबीच पुर्चौंडी नगरपालिकाका प्रमुख दिपकबहादुर बमले खोजपड्ताल शिविरको उद्दघाटन गरे । खोजपड्ताल शिविर उद्दघाटन कार्यक्रममा उपप्रमुख मीना धानुक, वडा अध्यक्ष लगायत अन्य सरोकारवालाहरुको सहभागिता रहेको थियो ।
