बैतडी –संघीय लोकतान्त्रिक गणतन्त्रको पक्षमा नेकपा एमालेले बैतडीमा पनि जागरण सभा सम्पन्न गरेको छ । सुदूरपश्चिमका अन्य जिल्लाजस्तै बैतडीमा एमालेले गणतन्त्रको पक्षमा जागरण सभा आयोजना गरेको एमाले बैतडीका उपाध्यक्ष लोकेन्द्र भण्डारीले बताए ।
एमालेले सोमबार गोठलापानीबाट र्याली निकालेर गढीमा कोणसभा गर्दै गणतन्त्रका पक्षमा जागरण सभा सम्पन्न गरेको हो ।
सभामा बोल्दै एमालेका नेताहरुले व्यवस्थाविरुद्ध अहिले प्रहार भइरहेकाले अहिलेको व्यवस्थाका बारेमा बताउन सभाको आयोजना गरिएको बताएका छन् ।
जागरण सभामा बोल्दै एमालेका केन्द्रीय सदस्य एवं बैतडी इञ्चार्ज लिलाधर भट्टले प्रतिक्रियावादी शक्तिहरु अहिले सक्रिय भइरहेको बताउँदै यो बिषयमा गणतन्त्र पक्षधरहरु सचेत हुनुपर्नेमा जोड दिए ।
नेपाली जनताको लामो त्याग र तपस्यापछि प्राप्त भएको यो व्यवस्थाका विरुद्ध केही शक्तिहरु लागेको भन्दै भट्टले गणतन्त्र पक्षधरहरु एकजुट हुनुपर्नेमा उनले जोड दिए । उनले भने, ‘सर्वसाधारणका छोराछोरी राज्य सञ्चालनको ठाउँमा पुगेको देख्न नसक्नेहरुले विरोध गरिरहेका छन् ।’
केही विकास भएको छैन् भन्ने गलत भाष्य निर्माण गरिएको भन्दै भट्टले केही कमीकमजोरी भए यसै व्यवस्थाबाट सुधार गरेर अघि बढ्नुपर्नेमा उनले जोड दिए ।
एमालेले आयोजना गरेको जागरण सभामा १० ओटै स्थानीयबाट एमालेका नेता–कार्यकर्ताहरुको सहभागिता रहेको थियो ।
जागरणसभामा केन्द्रीय सदस्य भट्टका साथै जिल्ला अध्यक्ष नरेश विक, उपाध्यक्ष लोकेन्द्र भण्डारी, नेता नरेन्द्र बिष्ट लगायतले सम्बोधन गरेका थिए ।
