बैतडी – पत्रकार सुरेश रजकको हत्या गरिएको विरोधमा बैतडी जिल्लामा शोक सभा र विरोध प्रदर्शन गरिएको छ। पत्रकार महासंघ शाखा बैतडीको आयोजनामा विरोध र्याली प्रशासन अगाडि गढी चोकमा कोणसभामा परिणत भएको थियो।

विरोध कार्यक्रमको उद्घाटन गोठलापानी कार्यालयबाट पम्पलेट सहित गरिएको र र्याली प्रशासन अगाडि पुगेर कोणसभा सम्पन्न भएको थियो। कोणसभामा बैतडी शाखाका अध्यक्ष नरि बडुले हत्यारालाई पक्राउ गरी कडा भन्दा कडा कारबाहीको माग गरेका छन्। उनले पत्रकार सुरेश रजकमाथि गरिएको आक्रमणलाई नियोजित हमला भएको आरोप लगाउँदै, यसले प्रेस स्वतन्त्रता र लोकतान्त्रिक मुल्य मान्यतामा गम्भीर खतरा उत्पन्न गरेको बताए।

नेपाल प्रेस युनियन बैतडीका अध्यक्ष भगीरथ अवस्थीले पत्रकारहरूमाथि भइरहेका आक्रमणलाई लोकतान्त्रिक मुल्य र स्वतन्त्र प्रेसमाथि खतरा रहेको भन्दै चिन्ता व्यक्त गरेका छन्। उनले भने, 'पत्रकारहरू जनताको आवाज हुन्। उनीहरूमाथि हुने आक्रमण सम्पूर्ण समाजमाथि हुने आक्रमण हो।'

काठमाण्डौको तिनकुनेमा एभिन्युज टेलिभिजनका क्यामेरापर्सन सुरेश रजकको शव घरभित्र जलेको अवस्थामा फेला परेको थियो। राजावादी समूहले गरेको आन्दोलनका क्रममा रजक भिडिओ खिच्दै गर्दा कार्यकर्ताले घरको गेटमा ताल्चा लगाइदिएर भित्र थुनेका थिए। सोही क्रममा आगजनी हुँदा उनका मृत्यु भएको बताइएको छ।

साथै, पत्रकार महासंघ र नेपाल प्रेस युनियनले दोषीलाई तत्काल पक्राउ गरी कडा कारबाही गर्न माग गरेका छन्।