बैतडी –बैतडीको सुर्नया गाउँपालिका–८ ढोलेस्थित शिखर बचत तथा ऋण सहकारी संस्थाको १६ औं बार्षिक साधारण सभा शनिबार सम्पन्न भएको छ । 

साधारण सभाले आगामी तीन बर्षका लागि नयाँ सञ्चालक समिति चयन गरेको छ । रमेशबहादुर बोहराको अध्यक्षतामा सहकारी सञ्चालक समिति चयन गरिएको निवर्तमान अध्यक्ष मानबहादुर बोहराले बताए । 

उक्त समितिको उपाध्यक्षमा भागरथी बोहरा, सचिवमा नरसिंह बोहरा, सहसचिवमा प्रकाशबहादुर बोहरा, कोषाध्यक्षमा जयसिंह बोहरा लगायत अन्य सदस्यहरु रहेका छन् । 

२०६६ सालमा स्थापना भएको सहकारी संस्थामा २ सय ३० जना शेयर सदस्य रहेका छन् भने २ सय १ जना बालबचतकर्ता रहेका छन् । 

सहकारी संस्थाको हालसम्म ५१ लाख ६४ हजार २१५ रुपैयाँ शेयर पूँजी रहेको छ भने ४२ लाख ७८ हजार ३८४ रुपैयाँ ऋण लगानी गरिएको छ । 

दुर्गम क्षेत्रका नागरिक बित्तीय सेवामा पहुँच पुर्याउन सहकारी संस्थाले स्थापना कालदेखि काम गरिरहेको निवर्तमान अध्यक्ष बोहराले बताए । 

सहकारी संस्थाका निवर्तमान अध्यक्ष मानबहादुर बोहराको अध्यक्षतामा भएको साधारण सभामा सुर्नया गाउँपालिका वडा नं ५ का वडा अध्यक्ष केशवबहादुर बिष्ट प्रमुख अतिथी रहेका थिए । 

साधारण सभामा सहकारी संस्थाका शेयर सदस्यहरुका साथै अन्य सरोकारवालाहरुको उपस्थिती रहेको थियो ।