बैतडी–बैतडीको दशरथचन्द नगरपालिकामा आजदेखि नगरस्तरीय टी–२० क्रिकेट प्रतियोगिता शुरु भएको छ । प्रतियोगितामा ७ नम्बर वडा बाहेकका अन्य १० ओटा वडाका टीमहरुको सहभागिता रहेको छ ।
प्रतियोगिताको आज दशरथचन्द खेलमैदान सुन्दरखालीमा एक कार्यक्रमकाबीच उद्दघाटन गरिएको छ ।
नगर खेलकुद विकास समितिका अध्यक्ष भुपेन्द्र चन्दको अध्यक्षतामा भएको प्रतियोगिता उद्दघाटन सत्रमा दशरथचन्द नगरपालिकाका प्रमुख पुष्करराज जोशी प्रमुख अतिथी रहेका थिए । प्रतियोगिता उद्दघाटन सत्रमा नगर उपप्रमुख कौशिला चन्द, वडा अध्यक्ष, विभिन्न सरकारी तथा गैरसरकारी निकायका प्रमुखहरुको उपस्थिती रहेको दशरथचन्द नगरपालिकाका शिक्षा शाखा प्रमुख हरिशप्रकाश भट्टले बताए ।
नगरपालिकाको बार्षिक कार्यक्रम अनुसार नगरस्तरीय पुरुष क्रिकेट प्रतियोगिता सञ्चालन गरिएको हो । प्रतियोगिता यही माघ १४ गतेसम्म सञ्चालन हुने भट्टले बताए ।
प्रतियोगिताको उद्दघाटन खेलमा दनपा ११ को टीमलाई पराजित गरेर दनपा ९ को टीमले विजयी शुरुवात गरेको छ ।
प्रतियोगितामा प्रथम हुने टीमलाई नगद ५० हजार रुपैयाँ पुरस्कारसहित ट्रफी र प्रमाणपत्र प्रदान गरिनेछ भने दोश्रो हुने टीमलाई नगद ३० हजार रुपैयाँ पुरस्कारसहित ट्रफी र प्रमाणपत्र प्रदान गरिनेछ ।
यस्तै म्यान अफ द सिरिजलाई नगद ५ हजार रुपैयाँ पुरस्कारसहित ट्रफी र प्रमाणपत्र, बेस्ट बलर र बेस्ट ब्याट्सम्यानलाई समान नगद २÷२ हजार पुरस्कार, ट्रफी र प्रमाणपत्र प्रदान गरिने आयोजकले जनाएको छ ।
यस्तै उदयीमान खेलाडीलाई नगद एक हजारसहित ट्रफी र प्रमाण पत्र दिइनेछ भने म्यान अफ द म्याचलाई नगद ५ सयसहित ट्रफी र प्रमाणपत्र प्रदान गरिनेछ ।
