बैतडी–नेपाल पत्रकार महासंघ शाखा बैतडीको नयाँ कार्यसमिति चयन भएको छ । शुक्रबार सम्पन्न महासंघ बैतडीको आठौं अधिवेशनले पत्रकार नरी बडूको अध्यक्षतामा नयाँ कार्यसमिति चयन गरेको हो ।
अध्यक्ष र कोषाध्यक्ष पदमा निर्वाचन भएको र अन्य पदमा निर्विरोध पदाधिकारी र सदस्यहरु चयन भएका निर्वाचन समितिले जनाएको छ ।
शुक्रबार भएको मतदानबाट ३९ मत प्राप्त गर्दै बडू अध्यक्षमा निर्वाचित भएका हुन् भने २४ मत प्राप्त गर्दै करुणाकर भट्ट कोषाध्यक्षमा निर्वाचित भएका हुन् ।
यस्तै महासंघको खुला उपाध्यक्षमा लक्ष्मण बिसी, महिला उपाध्यक्षमा रतना कलौनी, सचिवमा विनोदसिंह बिष्ट, सहसचिवमा केशवराज भट्ट र समावेशी सहसचिवमा मंगेश दयाल निर्विरोध निर्वाचित भएका निर्वाचन समितिका संयोजक नरेन्द्र भट्टले बताए । यस्तै ९ जना सदस्यहरु पनि निर्विरोध निर्वाचित भएका उनले बताए ।
आगामी ३ बर्षका लागि चयन भएको नयाँ कार्यसमितिका पदाधिकारी र सदस्यहरुलाई आज निर्वाचित भएको प्रमाण पत्र समेत प्रदान गरिएको छ । उनीहरुले आजै पद तथा गोपनीयताको शपथ समेत ग्रहण गरेका छन् ।
