बैतडी–बैतडीमा नयाँ प्रमुख जिल्ला अधिकारीको रुपमा दिर्घराज उपाध्याय हाजिर भएका छन् ।
गृहमन्त्रालयका उपसचिव उपाध्यायलाई केही दिन पहिला बैतडीको प्रमुख जिल्ला अधिकारीमा सरुवा गरेको थियो । प्रमुख जिल्ला अधिकारी उपाध्याय आज (सोमबार) कार्यालयमा हाजिर भएका हुन् ।
प्रमुख जिल्ला अधिकारी उपाध्यायको स्वागत समेत गरिएको छ ।
यस्तै बैतडीबाट सरुवा भएका प्रमुख जिल्ला अधिकारी भीमकान्त शर्माको बिदाई गरिएको छ । उनको जिल्ला प्रशासन कार्यालय डोटीमा दरबन्दी रहने गरेर विपद् जोखिम न्यूनीकरण तथा व्यवस्थापन प्राधिकरणमा सरुवा भएको छ ।
२०८० साल पुस ६ गते बैतडीमा प्रमुख जिल्ला अधिकारीको रुपमा हाजिर भएका शर्माको १० महिनामा सरुवा भएको हो ।
बैतडीको १० महिनाको बसाई निकै सुखद रहेको प्रमुख जिल्ला अधिकारी शर्माले बताए । धार्मिक पर्यटनको प्रचुर सम्भावना बोकको जिल्लाको रुपमा बैतडीलाई औल्याउँदै देवभूमी र पूण्यभूमीमा काम गर्न पाएकोमा गौरव लागेको उनले बताए ।
बैतडी आउनुभन्दा पहिला टाढाको जिल्ला भनेर सोचिएपनि यहाँ आइसकेपछि निकै रमाइलो अनुभूती भएको उनले बताए । जिल्लामा बस्दा सबै पक्षको सकारात्मक सहयोग पाइएको प्रमुख जिल्ला अधिकारी शर्माले बताए । जिल्लामा बस्दा सहयोग गर्ने सबैलाई उनले धन्यावाद समेत ज्ञापन गरेका छन् ।
