बैतडी–बैतडीमा चलिरहेको अटोबाट खसेर एक महिला घाइते भएकी छन् ।
महाकाली राजमार्ग अन्तर्गत बैतडीको गोकुलेश्वरबाट चम्तडीतर्फ आउँदै गरेको सुपप्र ०२००१ ह १७९० नम्बरको अटोमा सवार दार्चुलाको लेकम गाउँपालिकाकी अन्दाजी २८ बर्षीया सीता भट्ट अटोबाट खसेर घाइते भएकी हुन् ।
शुक्रबार दिउँसो पौने १ बजेको समयमा चलिरहेको अटोको एक्कासी झ्याल खुल्दा डिलाशैनी गाउँपालिका–६ डडीया भन्ने स्थानमा खसेर भट्ट घाइते भएकी हुन् । घाइते भट्टको दार्चुलाको गोकुलेश्वरस्थित मालिकार्जुन अस्पतालमा उपचार भइरहेको जिल्ला प्रहरी कार्यालयका प्रवक्ता प्रहरी निरीक्षक जनकराज ढुंगानाले बताए ।
अटो चालक डिलाशैनी गाउँपालिका –६ चौंसेराका ४१ बर्षीय डम्मरसिंह कठायतलाई अटोसहित प्रहरीले नियन्त्रणमा लिएको छ । घटनाका बिषयमा थप अनुसन्धान भइरहेको जिल्ला प्रहरी कार्यालय बैतडीका प्रवक्ता प्रहरी निरीक्षक ढुंगानाले बताए ।
