बैतडी–बैतडीको पञ्चेश्वरमा एक सुत्केरी महिलाको मृत्यु भएको छ ।
पञ्चेश्वर गाउँपालिका–१ शेरीकी १८ बर्षीया मनिषा घटालको मंगलबार साँझ साढे सात बजेतिर मृत्यु भएको हो ।
सोमबार दिउँसो मृत बच्चालाई जन्म दिएकी घटालको अत्यधिक रक्तश्रावका कारण मंगलबार साँझ मृत्यु भएको पञ्चेश्वर स्वास्थ्यचौकीका प्रमुख सुरेश सार्कीले बताए ।
घरमै सुत्केरी भएकी घटालले पेटभित्रै मरेको बच्चालाई जन्म दिएकी थिइन् । त्यसपछि उनलाई रक्तश्राव भएको र स्वास्थ्य संस्थामा नलाग्दा उनको अकालमै ज्यान गएको बुझिएको छ ।
मनिषा सुस्त मनस्थितीकी रहेकी समेत बुझिएको पञ्चेश्वर स्वास्थ्यचौकीका प्रमुख सार्कीले बताए ।
बर्षातका कारण पहिरोले बाटोघाटो अवरुद्ध हुँदा सुत्केरी महिलालाई स्वास्थ्य संस्थामा पुर्याउन नसकेको मृतकका आफन्तले जनाएका छन् । गाउँ नजिकैको शेरी बर्थिङ सेन्टर समेत बन्द हुँदा झन् समस्या भएको बताइएको छ ।
मनिषालाई रक्तश्राव हुँदा स्वास्थ्य संस्थामा लैजानुको सट्टा धामीझाक्रीको भर पर्दा उनको ज्यान गएको बुझिएको छ ।
ग्रामीण क्षेत्रमा अझै पनि धामीझाक्रीको भरपर्ने अन्धविश्वासले समस्या हुने गरेको पञ्चेश्वर स्वास्थ्यचौकीका प्रमुख सार्कीले बताए ।
