बैतडी–बैतडीको सुर्नया गाउँपालिकाको प्रमुख प्रशासकीय अधिकृतको जिम्मेवारी गाउँपालिकामा कार्यरत अधिकृत लोगराज जोशीलाई दिइएको छ ।
संघीय मामिला तथा सामान्य प्रशासन मन्त्रालयले गाउँपालिकामा प्रमुख प्रशासकीय अधिकृत नखटाउँदा सम्म वा अर्को व्यवस्था नहुञ्जेलसम्मका लागि जोशीलाई प्रमुख प्रशासकीय अधिकृतको जिम्मेवारी दिएको हो ।
जोशीले आजैदेखि कार्यभार सम्हालेको सुर्नया गाउँपालिकाका अध्यक्ष अम्मरबहादुर कुँवरले बताए । जोशीलाई प्रमुख प्रशासकीय अधिकृतको जिम्मेवारी दिएसंगै गाउँपालिकाका आर्थिक तथा प्रशासनिक कामहरु सुचारु भएका छन् ।
सुर्नया गाउँपालिका गएको भदौ ७ गतेदेखि प्रमुख प्रशासकीय अधिकृत विहिन बनेको थियो । संघीय मामिला तथा सामान्य प्रशासन मन्त्रालयले भदौ २६ गते शाखा अधिकृत ज्योतीकुमारी बोहरालाई सुर्नयाको प्रमुख प्रशासकीय अधिकृतमा खटाएको भएपनि भदौ २७ मै उनको गृहमन्त्रालयमा सरुवा गरेको थियो ।
सुर्नया गाउँपालिकाले पठाएको पत्र अनुसार जोशीलाई प्रमुख प्रशासकीय अधिकृतको जिम्मेवारी तोकिएको मन्त्रालयले जनाएको छ । स्थानीय सरकार सञ्चालन ऐन २०७४ को दफा ८४ को उपदफा ४ अनुसार जोशीलाई प्रमुख प्रशासकीय अधिकृतको जिम्मेवारी तोकिएको मन्त्रालयले जनाएको छ ।
