बैतडी–बैतडीको पाटन नगरपालिकाले योजना शाखा प्रमुख इन्जिनियर गोविन्दप्रसाद पन्तसहितका १३ जना करार कर्मचारीको म्याद थप नगर्ने निर्णय गरेको छ । 

असोज १० गतेदेखि लगातार ३ दिन बसेको कार्यपालिका बैठकले कार्तिक १ गतेदेखि लागू हुने गरेर १३ जना कर्मचारीको करार अवधि नथप्ने निर्णय गरेको हो । 

योजना शाखा प्रमुख इन्जिनियर पन्त, योजना शाखामै कार्यरत सव–इन्जिनियर दिनेशकुमार ऐर, सवारी चालक दिनेश चन्द र कार्यालय सहयोगी पुष्पराज गिरी रहेका छन् ।

यस्तै पाटन नगरपालिका–४ मा कार्यरत सामाजिक परिचालक जन्तरी बिष्ट, वडा नम्बर ६ मा कार्यरत यज्ञराज पन्त र वडा नम्बर १० मा कार्यरत विमला कुँवरको करार अवधि पनि नथप्ने निर्णय गरिएको छ । 

यस्तै वडा नं ७ मा कार्यरत कार्यालय सहायक हरिकुमार विक, सामाजिक परिचालक रामदत्त भट्ट र प्रशु सेवा प्राविधिक महेशकुमार चन्दको करार अवधि नथप्ने निर्णय भएको नगरपालिकाले जनाएको छ । 

वडा नम्बर १० स्थित सिद्धपुर स्वास्थ्यचौकीमा कार्यरत इश्वरी जोशी पन्त, वडा नम्बर ५ स्थित वसन्तपुर स्वास्थ्यचौकीमा कार्यरत शान्ति कठायत बोहरा , वडा नम्बर ३ मा कार्यरत लक्ष्मी लुहार दरबन्दी भन्दा बढी भएकाले उनीहरुको म्याद थप नगर्ने निणर्य भएको नगरपालिका स्रोतले बताएको छ ।

नगरपालिकामा दरबन्दी नभएका तर करारमा राखिएका कर्मचारीहरुलाई हटाइएको नगरपालिकाले दाबी गरेको छ । योजना शाखाका इन्जिनियर लगायतका कर्मचारीहरुको हकमा भने काम सन्तोषजनक नभएको नगरपालिकाले जनाएको छ । 

करारका १३ जना कर्मचारीको करार अवधि नथप्ने प्रस्ताव कार्यपालिकामा आएको र उक्त प्रस्ताव पास भएको नगर प्रमुख गौरीसिंह रावलले बताए । उनले भने ‘करारका कर्मचारीहरुको म्याद नथप्ने निर्णय भएको हो । यो निर्णय कार्यपालिका बैठकमा सर्वसम्मत पास भएको छ ।’

यसअघि पाटन नगरपालिकाले काम सन्तोषजनक नभएको भन्दै २०७९ पुषमा पनि तत्कालिन इन्जिनियर राजेन्द्रसिंह ठगुन्ना, सव इन्जिनियर भरत साउँद र लक्ष्मण महरालाई बर्खास्त गरेको थियो ।

यस्तै कार्यपालिका बैठकमा बजेट बाँडफाँडका बिषयमा पनि सहमति भएको छ । गएको असारमा नगरसभामा बजेट पेस भएपछि बजेट बाँडफाँड हुन सकेको थिएन् । यो कार्यपालिका बैठकले बजेट बाँडफाँडको टुंगो समेत लगाएको नगर प्रमुख रावलले बताए । यस्तै प्रत्येक वडालाई २५ लाखका दरले बजेट विनियोजन गरिएको छ । सोही सिलिङभित्र रहेर वडाहरुले योजना बनाउनेछन् । 

यस्तै कार्यपालिका बैठकले विद्यालय समायोजन गर्ने निर्णय पनि गरेको छ । नगर क्षेत्रभित्रका विद्यालयहरुको समायोजन प्रक्रिया अगाडि बढाउने निर्णय भएको सामाजिक विकास समितिका संयोजक एवं वडा नं ८ का वडा अध्यक्ष हरिश बिष्टले बताए ।