बैतडी –बैतडीमा करेन्ट लागेर एक महिलाको मृत्यु भएको छ ।
जिल्लाको पाटन नगरपालिका ६ डुङराकी ५७ बर्षीया जानकी लुहारको करेन्ट लागेर मृत्यु भएको हो ।
सोमबार दिउँसो साढे चार बजेको समयमा घरमा लुगा सुकाउन प्रयोग गरिएको ग्याबीन तारमा भिजेका लुगा सुकाउनका लागि राख्ने क्रममा लुहारलाई करेन्ट लागेको जिल्ला प्रहरी कार्यालयका प्रहरी निरीक्षक खेमविक्रम केसीले बताए ।
करेन्ट लागेर गम्भीर घाइते भएकी जानकीलाई उपचारका लागि लैजाँदै गर्दा बाटोमै मृत्यु भएको बताइएको छ ।
लुहारलाई करेन्ट लागेपछि छुटाउन गएका सोही ठाउँका ३८ बर्षीया कलावती ओड, १२ बर्षीया पवित्रा ओड, १० बर्षीया भुवनेश्वर ओड र २२ बर्षीया सीता लुहार करेन्टको झट्का लागेर समान्य घाइते भएका छन् । उनीहरुको स्वास्थ्य अवस्था समान्य रहेको प्रहरी निरीक्षक केसीले बताए ।
घटनाका बिषयमा थप अनुसन्धान भइरहेको प्रहरीले जनाएको छ ।
